चितवन । दसैँ बिदाका समयमा जिल्लाको पर्यटकीय नगरी सौराहाका होटल भरिभराउ भएका छन् । कोभिडका कारण लामो समय घुमफिरमा निस्कन नसकेका आन्तरिक पर्यटक आएसँगै होटल भरिभराउ भएका हुन् । सौराहामा आन्तरिकसँगै भारतीय र तेस्रो मुलुकका पर्यटक पनि आएका छन् ।
दसैँको फूलपातीको दिनयता अधिकांश होटल पर्यटकले भरिएको व्यवसायीहरूले बताएका छन् । क्षेत्रीय होटल सङ्घ चितवनका अध्यक्ष दीपक भट्टराईका अनुसार नवमी, दशमी र एकादशीका दिन सौराहाका होटल सतप्रतिशत भरिएका थिए । ती दिनमा कतिपय पर्यटकले राम्रा होटल नपाएपछि फर्किनु परेको थियो । फूलपाती र अष्टमीका दिनमा पनि ६५ प्रतिशतभन्दा बढी होटलका कोठा भरिएको उनले बताए । 
कतिपय होटल फूलपाती यता पूर्णिमासम्म पूर्णरूपमा बुकिङ भएका छन् । भट्टराईले भने, “१० प्रतिशत हाराहारी भारतीय पर्यटक छन् भने केही तेस्रो मुलुकका छन् । बाँकी सबै नेपाली हुन् ।”
होटल जङ्गल क्राउनका प्रमुख कार्यकारी निर्देशक सन्तोष गिरीका अनुसार उनको होटल फूलपाती यता पूर्णिमासम्म सबै कोठा बुकिङ भएका छन् । होटलमा ४० कोठा छन् । उनले भने “अहिले १०० कोठा भएको भए पनि खाली हुने अवस्था थिएन ।” नेपालीसँगै भारतीय, युरोपेली र इजरायली पर्यटक रहेको उनले जानकारी दिए ।
काठमाडौँ, पोखरा र पूर्वी नेपालका धेरै पर्यटक आफ्नो होटलमा आएको उनको भनाइ छ । होटलमा कोठा खाली नभएपछि धेरै पाहुनालाई अन्य होटलमा पठाउनु परेको उनले बताए । अहिले पनि सामाजिक सञ्जालमार्फत थुप्रै पाहुनाले पठाएका सन्देशको उत्तर आफूले दिन नभ्याएको गिरीले बताए ।
जङ्गल सफारी लजका सञ्चालक सुमन घिमिरे लकडाउनको समयमा समेत विभिन्न प्याकेज सार्वजनिक गरेर होटल बुकिङ गराउनेमध्येका एक हुन् । यो समयमा उनलाई पाहुनाका लागि कोठा पु¥याउन मुस्किल प¥यो । उनले भने, “विगतका वर्षको तुलनामा यसवर्ष दसैँमा सौराहाको पर्यटन व्यवसाय निकै राम्रो रह्यो ।”
अप्रत्यासित रूपमा पर्यटक सौराहा आएको भन्दै उनले व्यवस्थापन नै कठिन भएको बताए । क्षेत्रीय होटल सङ्घका निवर्तमान अध्यक्षसमेत रहेका घिमिरेको भनाइमा अबका दिनमा पनि पर्यटकको सङ्ख्या आशातित रूपमा वृद्धि हुने छ । आउँदा केही दिनसम्मका लागि धेरै होटलमा पर्यटकको बुकिङ छ । सौराहाका ११० पर्यटकीय होटलमा पाँच हजार ५०० बेड रहेका छन् ।
क्षेत्रीय होटल सङ्घका महासचिव गुणराज थपलियाले आन्तरिक र बाह्य पर्यटकले यो वर्षको दसैँमा सौराहा भरिएको बताए । युनिक वाइल्ड रिसोर्टका सञ्चालकसमेत रहनु भएका थपलिया विगत वर्षको भन्दा यसवर्षको दसैँमा आफ्नो होटलमा पाहुनाको चाप बढेको बताउँछन् । 
चितवन राष्ट्रिय निकुञ्ज र मध्यवर्ती सामुदायिक वनमा पर्यटकीय गतिविधिका लागि देशका विभिन्न क्षेत्रबाट पर्यटक यहाँ आएको उनको भनाइ छ । कतिपय घुम्नका लागि आएको र कतिपयले टीका लगाउनका लागि चितवन र छिमेकी जिल्ला आउँदा सौराहा आएको थपलिया बताउँछन् । उनले भने, “अबका दिन विगत जस्तो हुँदैन भन्नेमा हामी आशावादी छौँ ।”
होटलहरूमा पर्यटक भरिएसँगै रेष्टुरेन्टहरू पनि पर्यटकले भरिभराउ हुने गरेका छन् । सौराहाको राप्ती किनारमा धेरै रेष्टुरेन्टहरू छन् । यससँगै अन्य विभिन्न क्षेत्रमा पनि पर्यटकलाई लक्षित गरी रेष्टुरेन्ट बनाइएका छन् । रेन्टुरेन्ट एन्ड बार एसोसिएसन (रेवान) का अध्यक्ष दीपेन्द्र खतिवडा दसैँको टीकाको दिन राप्ती किनारमा एक हजारभन्दा बढी पर्यटक आएको अनुमान गरेको बताउँछन् । तस्बिर लिनेदेखि त्यहाँका रेष्टुरेन्टमा खाएर रमाउनेहरू नदी किनारमा आएका थिए ।
टीका लगाउन आएकाको चहलपहलले होटलसँगै रेष्टुरेन्ट भरिएको उनको भनाइ छ । सनसेट भ्यू रेष्टुरेन्टका सञ्चालक खतिवडा दसैँसँगै सौराहामा सकारात्मक सन्देश प्रवाह भएको बताउँछन् । चितवन राष्ट्रिय निकुञ्जको प्रवेशद्वार सौराहामा निकुञ्जमा रमाउनका लागि आन्तरिक र बाह्य पर्यटक आउने गर्दछन् । विगत दुई वर्षयता कोभिडका कारण थला परेको यहाँको व्यवसाय दसैँसँगै चलायमान भएको हो ।–रासस