नयाँ दिल्ली, १८ पुस । भारतको दिल्ली प्रदेशभित्र रहेका अक्सिजनसहितका कूल शय्यामध्ये ०.२ प्रतिशत शय्या मात्रै अहिले प्रयोगमा रहेका छन् । दिल्लीका मुख्यमन्त्री अरविन्द केजरीवालले आइतबार दिएको जानकारीअनुसार अक्सिजनसहितका कूल शय्यामध्ये ८२ शय्या मात्रै अहिले प्रयोग भएका हुन् ।  राष्ट्रिय राजधानी र त्यस आसपासका क्षेत्रमा अक्सिजनसहितका शय्या ३७ हजारभन्दा बढी रहेको पनि उनले जानकारी दिए । कोरोनाभाइरसको महामारी फेरि फैलिएर अक्सिजनसहितको शय्या चाहिएमा पर्याप्त हुनेगरी व्यवस्था गरिएको पनि मुख्यमन्त्री केजरीवालले बताए । 
अक्सिजनसहितका कूल शय्यामध्ये ९९.७८ प्रतिशत शय्या अहिले खाली नै रहेकाले चिन्ता लिनुपर्ने अवस्था नरहेको उनको भनाइ छ । कोरोनाभाइरसको महामारी फैलिएका बेला सबैभन्दा ठूलो आवश्यकता अक्सिजनसहितका शय्याको पर्ने भएकाले उच्च प्राथमिकताका साथ यसको व्यवस्था गरिएको मुख्यमन्त्री केजरीवालले बताए । कोरोनाभाइरसबाट सङ्क्रमितमध्ये गम्भीर अवस्थामा रहेकालाई मात्रै अक्सिजनसहितको शय्याको आवश्यकता पर्दछ ।– रासस/एएनआई