गण्डकी, १९ माघ ।  नेपाल भूतपूर्व खेलाडी मञ्चले प्रत्येक वर्ष सञ्चालन गर्दै आएको सफल पोखरा अन्तर्राष्ट्रिय म्याराथन दौड प्रतियोगिता दुई चरणमा हुने भएको छ  ।  काभिड– १९ को बढ्दो जोखिमलाई ध्यानमा राखेर प्रतियोगिता दुई चरणमा गर्ने मञ्चको आज सम्पन्न बैठकले निर्णय गरेको हो । नेपाल भूतपूर्व खेलाडी मञ्चद्वारा आयोजित उक्त प्रतियोगिताअन्तर्गत  खुला म्याराथन ४२।१९५ किमि र महिलातर्फको २१ किमि निर्धारित समय फागुन ७ गते नै हुने र  आपाङ्गतर्पmका १० र ५ किलोमिटर दौड चैत महिनाको १२ गते गर्ने निर्णय भएको मञ्चका अध्यक्ष हरिप्रसाद पराजुलीले जानकारी दिए ।
 उनले पोखरा म्याराथन देशकै जेठो म्याराथन रहेको दाबी गर्दै म्याराथन सफल बनाउन विभिन्न विषयगत समितिले तीव्रता दिँदै आएको बताए । म्याराथनलाई सफल बनाउन विभिन्न टोल विकास संस्था, आमा समूह र अन्य सङ्घ संस्थालाई सदा झैं यस पटक पनि सहयोगका लागि अपिल गर्दै उनले प्रतियोगिताले पोखराको पर्यटन प्रवद्र्धनमा सहयोग पुग्ने विश्वास व्यक्त गरे । 
मञ्चका महासचिव कृष्ण तिमिल्सिनाका अनुसार पोखरा म्याराथनअन्तर्गत खुला म्याराथनतर्फको पुरस्कारको राशि रु चार लाख नगद भएसँगै प्रतियोगितामा सहभागी हुन केन्यालगायत अन्य अफ्रिकी मुलुकबाट धावक पोखरा आउने तयारी गरिरहेको सूचना प्राप्त भएको छ । “पोखरा म्याराथनले अव विश्वव्यापी रुपमा चर्चा पाउन थालेको छ । यसका लागि विदेशबाट समेत धावक पोखरा आउनु गौरवको विषय हो”, उहाँले भन्नुभयो, “विदेशीसँगै स्वदेशी धावकले समेत म्याराथनमा सहभागीका लागि अनलाइनमार्फत दर्ता गराउन सकिनेछ ।”

ताजपुरिया परिषद्को महाधिवेशन स्थगित
ताजपुरिया समाज कल्याण परिषद्को पाचौँ केन्द्रीय महाधिवेशन स्थगित भएको छ । यही माघ २१ र २२ गते झापाको गौरादहस्थित केन्द्रीय कार्यालयमा हुने तय भएको महाधिवेशन कोभिड–१९ को बढ्दो जोखिमका कारण स्थगित गर्ने निर्णय भएको परिषद्ले जनाएको छ । परिषद्का अध्यक्ष गङ्गाराम ताजपुरियाले कोरोना महामारी सङ्क्रमण फैलिन नदिन सरकारले भेला, सभा, समारोहलगायत बढी भीडभाड हुने खालका कुनै पनि गतिविधि सञ्चालन नगर्न गरेको आग्रह अनुसार अर्को सूचना नआएसम्मका लागि महाधिवेशन स्थगित गरिएको बताउनुभयो । ताजपुरिया जातिको जनसङ्ख्या नेपालमा एक लाखभन्दा कम रहेको पाइएको छ ।