काठमाडौँ, २० माघ । नेपालमा कोरोना भाइरसको सङ्क्रमण दर घट्दै गएको छ । माघको पहिलो हप्ता उच्च रहेको सङ्क्रमणको दर क्रमशः घट्दै गएको छ । सङ्क्रमणदर घट्दै गएपछि निको हुनेको दर पनि बढेको छ । माघ ८ गते कूल परीक्षण गरिएकामध्ये ५०.८ प्रतिशतमा रहेको सङ्क्रमण माघ १९ गते आइपुग्दा ३१.४ प्रतिशत रहेको छ । माघ ८ गते २० हजार १८७ परीक्षण गर्दा १० हजार २५४ मा सङ्क्रमण पुष्टि भएको थियो । हिजो माघ १९ गते बुधबार ११ हजार ५८२ परीक्षणमा तीन हजार ६३७ जनामा सङ्क्रमण भएको थियो । स्वास्थ्य तथा जनसङ्ख्या मन्त्रालयका सहप्रवक्ता डा समीरकुमार अधिकारीले सङ्क्रमण दरको अनुपात घटेको बताए । मानिसमा खोप लगाउने र रोगप्रतिरोधात्मक क्षमता बढेकाले सङ्क्रमणमा कमी आएको उनको भनाइ थियो । उहाँले सङ्क्रमण दरको अनुपात घटे पनि जोखिम भने बढेको बताए । हिजो माघ १९ गते सात हजार ५५५ जना सङ्क्रमणबाट निको भएर घर फर्किएका छन् । अहिले निको हुने दर ९१.६ प्रतिशत पुगेको छ । 
सबभन्दा धेरै सङ्क्रमण माघ ६ गते २७ हजार ४९७ परीक्षणमा १२ हजार ३३८ सङ्क्रमण पुष्टि भएको थियो । सक्रिय सङ्क्रमित ५७ हजार ३२८ जना रहेका थिए । उक्त दिन सङ्क्रमणको दर ४४.९ प्रतिशत रहेको थियो ।  सङ्क्रमण दर माघ ११ गतेदेखि ओरालो लागेको छ । माघ ११ गते कूल परीक्षण गरिएकामध्ये ४६.३ प्रतिशतमा रहेको सङ्क्रमण दर क्रमशः ओरालो लागेको मन्त्रालयले जनाएको छ । माघ १२ गते ४१.५ प्रतिशत, माघ १३ गते ३६.८ प्रतिशत, माघ १४ गते ३४.४ प्रतिशत, माघ १५ गते ३३.७ प्रतिशत, माघ १६ गते २६.९ प्रतिशत, माघ १७ गते ३२.९ प्रतिशत, माघ १८ गते ३१.६ प्रतिशत रहेको छ । 
सङ्क्रमण दर कम हुन थालेपछि जनजीवन सामान्य बन्दै गएको छ । सरकारले सङ्क्रमण दर बढ्दै गएपछि माघ ६ गतेदेखि उपत्यकामा सवारीसाधनमा जोर गते जोर नम्बर र बिजोर गते बिजोर नम्बर प्रणाली लागू गरेको थियो तर अहिले भने सङ्क्रमण दर घट्दै गएपछि भने भाडाका सवारी साधनबाहेक सबैमा जोर र बिजोर प्रणाली लागू गरेको छ ।  
मानिसमा सङ्क्रमण घट्दै गए पनि स्वास्थ्यका मापदण्ड भने लागू नगरेको पाइएको छ । भीडभाडमा जाने, मास्क नलगाउने, साबुन पानीले हात नधुने तथा सेनिटाइजर प्रयोग नगर्ने, भौतिक दूरी कायम नराख्ने जस्ता क्रियाकपाल भइरहेको छ । 
हाल होम आइसोलेशनमा ६७ हजार ८२५, संस्थागत आइसोलेशनमा एक हजार ४६६, आइसियुमा २७० र भेन्टिलेटरमा ५२ जनाको उपचार हुँदैछ । कोभिड–१९ केन्द्रीय युनिफाइड ९वीर अस्पताल० अस्पतालका प्रमुख प्रशासकीय अधिकृत डा भूपेन्द्रकुमार बस्नेतले अहिलै अस्पतालमा आउने सङ्क्रमितको सङ्ख्या आधाले घटेको बताए । उनका अनुसार पहिले दैनिक ३० देखि ४० सङ्क्रमित आउने गरेकामा अहिले १५ देखि २० मात्रा आउने गर्दछन् । उहाँ कोरोना भाइरस विरुद्धको खोपले रोग प्रतिरोधात्मक क्षमताको विकास गरेकाले सङ्क्रमित हुने सङ्ख्या घटेको बताउनुहुन्छ । अस्पतालमा अहिले १६३ जना सङ्क्रमितको उपचार भइरहेको छ । तीमध्ये ३५ को सघन उपचार कक्ष (आइसियु), आठको भेन्टिलेटरमा उपचार भइरहेको छ । 
सशस्त्र प्रहरी बल अस्पतालमा २० हाई डिपेन्डेन्सी युनिट (एचडियु), पाँच  आइसियु र एक भेन्टिलेटरमा उपचार भइरहेको छ । शुक्रराज ट्रपिकल तथा सरुवा रोग अस्पतालमा दुई आइसियु र दुई भेन्टिलेटरमा उपचार भइरहेको छ । 
सरकारले निरन्तर कोरोना भाइरस विरुद्धको खोप अभियान सञ्चालन गरिरहेको छ । अहिले पनि १२ वर्षदेखि माथिका सबैलाई खोप लगाउनका लागि अभियान नियमित सञ्चालन छ । पहिलो र दोस्रो मात्रा तथा बुष्टर डोज दिइरहेको छ । अहिलेसम्म चार करोड ५७ लाख आठ हजार ६४० मध्ये तीन करोड २४ लाख ५८ हजार २९९ मात्रा खोप लगाइएको छ । यस्तै अहिलेसम्म कोरोना भाइरस विरुद्धको बुस्टर डोज चार लाख ८४ हजार ४७९ मात्रा लगाइसकेका छन् । 
अहिलेसम्म लक्षित जनसङ्ख्यामध्ये ८६.१ प्रतिशतले पहिलो मात्रा र ७४।४ प्रतिशतले पूर्ण मात्राको खोप लगाइसकेका छन् । कूल जनसङ्ख्याको ५६.४ प्रतिशतले पहिलो मात्रा र ४८.८ प्रतिशतले पूर्ण मात्राको खोप लगाइसकेका छन् । सरकारको आगामी चैत मसान्तभित्र लक्षित सबै जनसङ्ख्यालाई खोप लगाउने योजना रहेको छ । अहिले सार्वजनिक ठाउँमा खोप लगाएको कार्ड अनिवार्य गरिएपछि सबै नागरिकले खोप लगाइरहेका छन् । 

प्रदेश नं १ मा पनि सङ्क्रमण दर घट्दै
विगत केही दिनदेखि प्रदेश नं १ मा कोरोना सङ्क्रमण दर घट्दै गएको छ । सङ्क्रमणमुक्त दर भने बढेको पाइएको छ । पछिल्लो २४ घण्टाको अवधिमा प्रदेश नं १ मा २६८ जनामा कोरोना सङ्क्रमण भएको छ । सोही अवधिमा १९९ महिलासहित ४२६ कोरोना सङ्क्रमणमुक्त भएको सामाजिक विकास मन्त्रालयले जनाएको छ । मन्त्रालयका अनुसार ३५४ जनाको पीसीआर परीक्षण गर्दा १३१ र ५५७ जनाको एन्टिजेन परीक्षण गर्दा १३७ जनामा कोरोना सङ्क्रमण पुष्टि भएको छ । पिसिआर परीक्षणका आधारमा मोरङमा ५३, झापामा ३७, सुनसरीमा १८, इलाम र उदयपुरमा दुई÷दुई, ताप्लेजुङ, सोलुखुम्बु, सङ्खुवासभा, तेह्रथुम र खोटाङमा एक÷एक र प्रदेश बाहिरका १४ जनामा सङ्क्रमण देखिएको हो ।  स्थानीय पालिकाअनुसार मोरङको विराटनगरमा सबैभन्दा २७ र सुनसरीको इटहरीमा ११ सहित प्रदेशमा ३७ वटा पालिकामा सङ्क्रमण देखिएको हो । प्रदेशमा आज एक महिलासहित दुईको मृत्यु भएको र चार हजार ७०५ सक्रिय सङ्क्रमित रहेको मन्त्रालयले जनाएको छ ।

सुदूरपश्चिममा भेटिए १७२ मा सङ्क्रमित 
सुदूरपश्चिम प्रदेशमा बिहीबार थप १७२ जनामा कोरोना सङ्क्रमण देखिएको छ । गएको २४ घण्टामा प्रदेशभर पीसीआर र एन्टिजेन विधिबाट एक हजार ३१९ जनाको नमूना परीक्षण गर्दा १७२ जनामा  सङ्क्रमण पुष्टि भएको स्वास्थ्य निर्देशनालयले जनाएको छ ।  
पीसीआरमार्फत १९ र एन्टिजेनमार्फत १५३ जनामा पुष्टि भएको हो । गएको २४ घण्टामा प्रदेशभर २२४ जना निको भएका छन् । उक्त अवधिमा यस प्रदेशमा  सङ्क्रमणका कारण  एक जनाको मृत्यु भएको छ । कैलालीको धनगढी उपमहानगरपालिका–३ का ७४ वर्षीया महिलाको उपचारको क्रममा सेती प्रादेशिक अस्पतालमा मृत्यु भएको हो । यसअघि बुधबार यस प्रदेशमा २०३ जनामा सङ्क्रमण पुष्टि हुँदा ५३ निको भएका थिए । सुदूरपश्चिममा सङ्क्रमणका कारण हालसम्म ६२५ को ज्यान गइसकेको छ ।