बुधबार थपिए ६३९ सङ्क्रमित, तीन जनाको मृत्यु 
काठमाडौँ, ४ फागुन ।  देशभर पछिल्लो २४ घण्टामा थप ६३९ जनामा कोभिड–१९  सङ्क्रमण पुष्टि भएको छ । स्वास्थ्य तथा जनसङ्ख्या मन्त्रालयका अनुसार पछिल्लो समय नौ हजार ७५६ को परीक्षण गर्दा सो सङ्ख्यामा सङ्क्रमण पुष्टि भएको हो । 
मन्त्रालयका अनुसार ६ हजार ७८२ जनानाको पीसीआर परीक्षण गर्दा ५४८ र दुई हजार ९७४ जनाको एन्टीजेन परीक्षण गर्दा १८५ गरी ६३९ जनामा संक्रमण पुष्टि भएको छ ।

योसँगै नेपालमा पिसिआर विधिबाट गरिएको परीक्षणमा कोरोना भाइरस सङ्क्रमितको सङ्ख्या नौ लाख ७४ हजार ४९३ पुगेको छ । एन्टिजेन परीक्षण गर्नेको सङ्ख्या एक लाख ३८ हजार ४४ रहेको छ । 
बुधबार थपिएसँगै नेपालमा कोरोना संक्रमितको कूल संख्या ११ लाख १२ हजार ५३७ पुगेको छ । पछिल्लो समय थप एक हजार ६०० सङ्क्रमणमुक्त  भएका छन् । योसँगै सङ्क्रमणमुक्त हुनेको सङ्ख्या नौ लाख ४४ हजार ३३७ पुगेको छ । 

थप तीनको मृत्यु 

बुधबार कोरोना भाइरस संक्रमणका कारण ३ जनाको ज्यान गएको छ । आज मृत्यु भएकासहित हालसम्म कोरोनाबाट मृत्यु हुनेको सङ्ख्या ११ हजार ९०५ पुगेको छ । कोरोना भाइरस सङ्क्रमणबाट हुने मृत्यु दर १.२ प्रतिशत रहेको छ ।  त्यसैगरी पछिल्लो समय दुई लाख १४ हजार १०३ ले खोप लगाएको पनि मन्त्रालयले जानकारी दिएको छ । हाल सक्रिय सङ्क्रमितको सङ्ख्या १८ हजार २५१ रहेको छ । अहिले होम आइसोलेसनमा १७ हजार ५८० रहेका छन् । त्यसैगरी संस्थागत आइसोलेसनमा ६७१ आइसीयुमा १५६ र भेन्टिलेटरमा २६ जनाले उपचार गराइरहेका छन् ।