खजुरा । बाँके जिल्लामा प्रतिनिधिसभातर्फका तीन क्षेत्रमध्ये एमाले, राप्रपा नेपाली कांग्रेसका उम्मेदवारले अग्रता लिएका छन् । क्षेत्र नं १ मा सत्ता गठबन्धनको तर्फबाट उम्मेदवार बनेका नेकपा माओवादीका महेश्वरजङ गहतराजलाई पछि पार्दै नेकपा एमालेका उम्मेदवार सूर्य ढकालले अग्रता लिएको हो । 

तेह्र हजार सात सय ५४ मतगणना हुँदा ढकालले चार हजार नौ सय ३५ मतका साथ अग्रता लिएको निर्वाचन अधिकृतको कार्यालयले जनाएको छ । नेकपा माओवादी केन्द्र का गहतराजले तीन हजार नौ सय ६ मतका साथ पछ्याइरहेको छ । क्षेत्र नं २ मा २७ हजार नौ सय ७५ मतगणना हुँदा राप्रपाका महामन्त्री डा धवलशम्शेर राणाले १३ हजार तीन सय ५१ मतका साथ अग्रता कायम गरेको छ । यहाँ जनता समाजवादी पार्टी (जसपा) का मोहम्मद इश्तियाक राइले आठ हजार पाँच सय ३९ मत, नेपाली कांग्रेसका सुदीपनरसिंह राणाले एक हजार सात सय ५९ मत प्राप्त गरेको मुख्य निर्वाचन अधिकृत धनसिंह महराले जानकारी दिए ।

क्षेत्र नं ३ मा कांग्रेसका सहमहामन्त्री किशोरसिंह राठौरले सात हजार चार सय ६५ मत ल्याएर अहिले अग्रता कायम गरेको छ । योभन्दा अघि उनी सुरुदेखि दोस्रो स्थानमा थिए । नेकपा एमालेका किस्मतकुमार कक्षपतिले सात हजार दुई सय ४३ मत प्राप्त गरेको छ भने  राष्ट्रिय स्वतन्त्र पार्टीका देवेन्द्रनाथ शुक्लाले  दुई हजार छ सय २९ मत प्राप्त गरेको छ । 

प्रतिनिधिसभा र प्रदेशसभा सदस्य निर्वाचनको मतगणना तीन स्थानमा भइरहेको छ । क्षेत्र नं १ को राप्ती सोनारी गाउँपालिका सभाकक्ष  क्षेत्र नं २ को नेपालगञ्जस्थित भेरी प्राविधिक शिक्षालय र क्षेत्र नं ३ को खजुरास्थितकपास विकास समितिको कार्यालय परिसरमा मतगणना भइरहेको छ । रासस