खोटाङ । प्रतिनिधिसभा सदस्यमा लोकतान्त्रिक–वाम गठबन्धनका साझा उम्मेदवार नेकपा माओवादी केन्द्रका पोलिटब्यूरो सदस्य एवं १ नं प्रदेश सरकारका खानेपानी, सिँचाइ तथा ऊर्जामन्त्री रामकुमार राई ‘पासाङ’ले मतान्तर पुनः बढाएका छन् ।  मन्त्री पासाङले पाँच हजार सात सय ५८ मत प्राप्त गर्दा नेकपा एमालेका पोलिटब्यूरो सदस्य एवं एमाले संसदीय दलका निवर्तमान प्रमुख सचेतक विशाल भट्टराईले चार हजार नौ सय ७४ मत प्राप्त गरेका छन् । 
बाह्र हजार एक सय ६७ मतगणना हुँदा गठबन्धनका साझा उम्मेदवार मन्त्री पासाङ सात सय ८४ मतले अगाडि रहेका छन् । प्रतिनिधिसभातर्फ हलेसी तुवाचुङ नगरपालिका र दिप्रुङ चुइचुम्मा गाउँपालिकाको मतगणना भइरहेको छ । 
प्रदेशसभा (१) मा गठबन्धनका उम्मेदवार नेकपा एकीकृत समाजवादीका १ नं प्रदेश समन्वय समिति संयोजक वीरबलकाजी राई नौ सय ९२ मतले पछाडि परेका छन् । नेकपा एमालेका १ नं प्रदेश समिति सदस्य पाँचकर्ण राईले पाँच हजार दुई सय ३५ मत ल्याउँदा वीरबलकाजीले चार हजार चार सय ६९ मत प्राप्त गरेका छन् । 

प्रदेशसभा (२) मा गठबन्धनका उम्मेदवार नेपाली कांग्रेस १ नं प्रदेश समितिका महामन्त्री भूपेन्द्र राईले आफ्नो अग्रता कायमै राखेका छन् । महामन्त्री राई नेकपा (एमाले) खोटाङका अध्यक्ष रामप्रसाद दङ्गालभन्दा चार सय ३६ मतले अगाडि भएका हुन् । 
महामन्त्री राईले पाँच हजार पाँच सय ५३ मत प्राप्त गर्दा दङ्गालले पाँच हजार एक सय १७ मत प्राप्त गरेका छन् । प्रदेशसभा (२) मा अहिले दिप्रुङ चुइचुम्मा गाउँपालिकाको मतगणना भइरहेको छ । 
एक लाख ४२ हजार सात सय ९२ मतदाता रहेको जिल्लामा ६७ हजार तीन सय ७३ मत अर्थात् ४७ दशमलव १८ प्रतिशतमात्र मत खसेको छ । प्रतिनिधिसभा सदस्यमा आठ, प्रदेशसभा (१) मा १० जना र प्रदेशसभा (२) मा छ उम्मेदवार रहेको जिल्लामा गठबन्धन दल र एमालेबीच प्रतिस्पर्धा हुने देखिएको छ । 

बाँके–२ (१) मा भण्डारीलाल यादव विजयी
बाँके–२को प्रदेशसभा (१) मा जनता समाजवादी पार्टी (जसपा) का भण्डारीलाल यादव विजयी भएका छन् । 
यादवले ११ हजार पाँच सय चार मत प्राप्त गरी विजयी भएका हुन् । उनका निकटतम् प्रतिद्वन्द्वी नेकपा एमालेका विजयबहादुर यादवले नौ हजार तीन सय ५८ मत प्राप्त गरेका थिए । यहाँ नेपाली कांग्रेसका उम्मेदवार राजकुमार कुर्मीले आठ हजार सात सय ३१ मत पाएका छन् । 
बाँके क्षेत्र नं २ (१) मा ३५ हजार आठ सय ६८ मत खसेको थियो । त्यसमा ३३ हजार चार सय ८५ मत सदर भएको र दुई हजार तीन सय ८३ मत बदर भएको बाँकेका मुख्य निर्वाचन अधिकृत धनसिंह महरले जानकारी दिए ।