काठमाडौं । अवकाशमा पठाउने नेपाली सेनाको जंगीअड्डाको निर्णयविरुद्ध सर्वोच्च अदालत गएका उपरथी प्रेम शाही २ महिनापछि थुनामुक्त भएका छन् ।  जंगीअड्डाभित्रै थुनेर राखिएका उच्च सैनिक अधिकृत शाहीसहित उनलाई सहयोग गरेको अभियोगमा समातिएका प्राड विभागका प्रमुख सेनानी कुलदिप तिमसिना र महासेनानी महेन्द्रजंग शाह पनि थुनामुक्त भएका छन् । तिमसिना र शाहको २ वर्ष बढुवा रोक्का गर्ने आदेश भएको छ ।

उपरथी शाही संलग्न सैनिक विद्रोहको कसूरसम्बन्धी मुद्दा पुर्पक्षका लागि भन्दै बुधबार जंगीअड्डा बोलाइएका तिमसिना र शाहलाई सेनाले नियन्त्रणमा लिएको थियो ।
उनीहरु पक्राउ पर्नेबित्तिकै परिवारका सदस्यले सर्वोच्च अदालतमा बन्दी प्रत्यक्षीकरणको रिट दर्ता गरेका थिए । सर्वोच्चका न्यायाधीश हरिप्रसाद फुयालको इजलासले दुवै जनालाई ३ दिनभित्र अदालतमा उपस्थित गराउन आदेश दिएको थियो ।
आदेश दर्ता गर्न पुगेका अदालतका कर्मचारी र आफन्त दिनभर जंगीअड्डा बसेर फर्किएका थिए ।
साँझ उपरथी ताराध्वज पाण्डे नेतृत्वको समरी जनरल सैनिक अदालतले सैनिक विद्रोह सम्बन्धी कसूरमा उपरथी शाहीलाई बर्खास्त र २ जनालाई विभागीय कारबाहीको आदेश सुनाएको छ । आदेश आएलगत्तै तीनै जनालाई थुनामुक्त गरिएको सैनिक स्रोतले बतायो ।