ललितपुर । नवनिर्वाचित राष्ट्रपति रामचन्द्र पौडेललाई ललितपुरका तीनवटा स्थानीय तहका जनप्रतिनिधिले भेटेर बधाई तथा शुभकामना दिएका छन् । ललितपुर महानगरपालिका, गोदावरी नगरपालिका र महालक्ष्मी नगरपालिकाका निर्वाचित जनप्रतिनिधिले शितल निवास पुगेर बधाई तथा शुभकामना दिएका हुन् ।

भेटमा ललितपुर महानगरका प्रमुख चिरीबाबु महर्जन, गोदावरी नगरका प्रमुख गजेन्द्र महर्जन र महालक्ष्मी नगरपालिकाका उपप्रमुख लक्ष्मी महर्जनले पालिकामा भएका गतिविधिबारे राष्ट्रपतिलाई जानकारी गराए । भेटमा तीनवटै पालिकाका वडाअध्यक्षसहित कार्यपालिका सदस्य र स्थानीयवासी समेत सहभागी थिए ।

राष्ट्रपति रामचन्द्र पौडेलले जनप्रतिनिधिसहित सम्पूर्णलाई धन्यवाद दिए । सो क्रममा ललितपुर महानगरपालिकाका प्रमुख चिरीबाबु महर्जनले ललितपुर महानगरपालिकाको मुखपत्र ‘हाम्रो ललितपुर’, शताब्दी पुरुष संस्कृतिविद् सत्यमोहन जोशीद्धारा लिखित महानगरद्धारा प्रकाशित पुस्तकहरु, महानगरभित्रका वनस्पतिहरुको बारेमा लिखित पुस्तक हस्तान्तरण गरे । त्यस्तै, गोदावारी नगरपालिकाका प्रमुख गजेन्द्र महर्जनले पनि गोदावारी नगरपालिकाको मुखपत्र ‘गोदावरी’ हस्तान्तरण गरे ।