काठमाडौँ । सत्ता गठबन्धनको म्याराथन बैठकपछि प्रधानमन्त्री पुष्पकमदल दाहाल प्रचण्डले आज साँझसम्म मन्त्रिपरिषद् विस्तार गर्ने तयारी गरेका छन् । सत्ता साझेदार दलबीच बुधबार दुई चरणमा तथा बिहीबार बिहान बैठक बसेपछि प्रधानमन्त्रीले मन्त्रिपरिषद् विस्तारको तयारी गरेका हुन् । 
प्रधानमन्त्री निवास बालुवाटारमा बिहान भएको छलफलमा साँझसम्म मन्त्रिपरिषद् विस्तार गर्ने विषयमा शीर्ष नेताहरुबीच सहमति भएको जनता समाजवादी पार्टी नेपालका नेता राजेन्द्र श्रेष्ठले जानकारी दिए।
बिहानको छलफल सकिए लगत्तै प्रधानमन्त्री प्रचण्ड गृह जिल्ला चितवन गएका छन् । प्रधानमन्त्री चितवनबाट फर्केपछि पुनः अपराह्न २ बजे सत्ता गठबन्धनको बैठक बस्दैछ । “जुन जुन दलको तर्फबाट मन्त्रिपरिषद्मा सहभागी हुने व्यक्तिको नाम टुङ्गो लागेको छ, उहाँहरु पुनः आउनुपरेन । जसको टुङ्गिएको छैन, उहाँहरुले पुनः संस्थागतरुपमा निर्णय गरेर आउने सहमति भएको छ”, नेता श्रेष्ठले भने ।
प्रधानमन्त्री दाहालले नै अग्रसरता लिएर केही दलका तर्फबाट सरकारमा सहभागी हुनेको नाम करिब टुङ्गो लगाइदिनुभएको जानकारी दिँदै नेता श्रेष्ठले सबै विषयमा मतैक्य भए आज साँझसम्म मन्त्रिपरिषद् विस्तार हुने बताए । “कुन दलले के कति मन्त्रालय लिने भन्नेबारे सहमति भएको छ । त्यसलाई संस्थागतरुपमा निर्णय गरौं  भनिएको हो”, उनले भने । 
बुधबारको बैठकमा नै नेपाली कांग्रेसले आठ, नेकपा माओवादी केन्द्रले पाँच, नेकपा एकीकृत समाजवादी र जसपाले दुई÷दुई मन्त्रालय लिने सहमति भइसकेको छ । अन्य दलले एक÷एक मन्त्रालय लिने तय भएको छ । बैठकमा सत्ता साझेदार दलका शीर्ष नेताको सहभागिता थियो ।