काठमाडौँ । नेपाली कांग्रेसले सरकारमा सहभागी हुने नेताहरुको विषयमा निर्णय लिन केन्द्रीय कार्यसम्पादन समितिको बैठक बसेको छ । पार्टी केन्द्रीय कार्यालय सानेपामा बिहान १० बजे देखि सृुरु भएको बैठकमा पार्टीका तर्फबाट सरकारमा सहभागी हुने मन्त्री र प्रतिनिधिसभाको उपनिर्वाचनमा पार्टीका उम्मेदवारको चयनलगायत विषयमा छलफल हुने कांग्रेस मुख्यसचिव कृष्णप्रसाद पौडेलले जानकारी दिए । 
यही चैत ६ गते विश्वासको मत पुनः लिएका प्रधानमन्त्री पुष्पकमल दाहाल ‘प्रचण्ड’ले आफूलाई विश्वासको मत दिने दललाई सरकारमा सहभागी गराउन आज मन्त्रिपरिषद् विस्तार गर्ने तयारी गरेका छन् । गठबन्धन दलहरुले मन्त्रीहरुको नामावली उपलब्ध गराएपछि आज साँझसम्म सरकार विस्तारको तयारीमा प्रधानमन्त्री रहेका छन् ।