काठमाडौं। नेपाली कांग्रेसले वैशाख १० गते हुने उपनिर्वाचनका लागि दुईवटा क्षेत्रमा उम्मेदवार टुंग्याएको छ । पार्टी कार्यालय सानेपामा बिहीबार बसेको कांग्रेस केन्द्रीय कार्यसम्पादन समितिको बैठकले तनहुँ १ मा केन्द्रीय सदस्य गोविन्द भट्टराई र चितवन २ मा जीत नारायण श्रेष्ठलाई उम्मेदवार बनाउने निर्णय गरेको छ । 
बारा २ मा भने कांग्रेसले उम्मेदवार तय गरेको छैन । यो क्षेत्रमा जसपालाई सघाउने कांग्रेसको तयारी छ। तनहुँ १ बाट निर्वाचित रामचन्द्र पौडेल राष्ट्रपति र बारा २ बाट निर्वाचित रामसहायप्रसाद यादव उपराष्ट्रपति भएपछि सो क्षेत्रमा उपनिर्वाचन हुन लागेको हो ।
यस्तै रास्वपाका रवि लामिछाने नागरिकता विवादमा दोषी ठहर भएपछि चितवन २ मा पनि उपनिर्वाचन हुन लागेको हो । उपनिर्वाचनका लागि निर्वाचन आयोगले चैत २० सम्म मनोनयन दर्ताको समय तोकेको छ।