पक्षमा एमालेको ओली समूहकै मात्र मत
विपक्षमा कांग्रेस, माओवादी केन्द्र, जसपा भित्रको उपेन्द्र बाबुराम समूहको मत
साना दलले पनि विपक्षमा मत दिए  

काठमाडौं । प्रधानमन्त्री केपी शर्मा ओलीले संसद्मा विश्वासको मत जुटाउन असफल भएका छन् । संसद्को विशेष अधिवेशनमा सोमबार विश्वासको मतसम्बन्धी प्रस्तावमा मतदान हुँदा विश्वासको मतको पक्षमा ९३ मत परेको छ भने विपक्षमा १२४ मत परेको छ । १५ मत दिन्न भन्ने पक्षमा परेको छ ।
संसद्मा कुल सदस्य मध्ये २३२ उपस्थित थिए । विश्वासको मतको पक्षमा नेकपा एमालेका ओली समूहले मात्र मतदान गरेको थियो । विपक्षीमा नेपाली कांग्रेस, नेपका माओवादी केन्द्र, जनता समाजवादी पार्टीका उपेन्द्र–बाबुराम समूह, साना दलले मत राखेका थिए । विश्वासतको मत दिने दिन नेकपा एमालेको माधव कुमार नेपाल–झलनाथ खनाल समूह पनि उपस्थित थिएन् ।
संवैधानिक व्यवस्थानुसार २७५ सदस्यीय प्रतिनिधिसभामा हाल २७१ सदस्य कायम  छ । दल त्यागसम्बन्धी व्यवस्था अनुसार नेकपा (माओवादी केन्द्र) ले कारवाही गरेपछि मन्त्री टोपबहादुर रायमाझी, प्रभु साह, लेखराज भट्ट र गौरीशंकर चौधरीको स्थान रिक्त छ । सांसद विजयकुमार गच्छदार, मोहम्मद आफताव आलम, रेशम चौधरी र हरिनारायण चौधरी निलम्बनमा छन् । प्रधानमन्त्रीको आफूप्रति विश्वास छ भन्ने प्रस्ताव पारित हुन हाल कायम रहेको २७१ सदस्यको बहुमत अर्थात् १३६ मत प्राप्त गर्न आवश्यक छ । मत बराबर भएका खण्डमा सभामुखले निर्णायक मत दिनेछन् । अधिवेशनमा २६६ सांसदले मतजाहेर गर्नेछन् । 
प्रधानमन्त्री ओलीले राख्ने विश्वासको मतमा एमालेका १२१, नेकपा (माओवादी केन्द्र)का ४८, नेपाली कांग्रेसका ६१, जनता समाजवादी पार्टीका ३२, राष्ट्रिय जनमोर्चा, नेपाल मजदूर किसान पार्टी र  राष्ट्रिय प्रजातन्त्र पार्टीका एकएक तथा स्वतन्त्र एक सांसदलाई मताधिकार छ । 
मत विभाजन प्रक्रियाबाट विश्वासको मतको टुङ्गो लगाइएको हो । मत विभाजनका लागि सभामुख अग्निप्रसाद सापकोटाले प्रस्ताव निर्णयार्थ प्रस्तुत गर्दै निर्वाचन प्रक्रियाका बारेमा जानकारी गराएका थिए । मत विभाजनका लागि हुन्छ, हुन्न र दिन्न भन्ने तीन तरिका व्यवस्था गरिएको थियो । विश्वासको मत लिने सन्दर्भमा यस पटकको विशेष व्यवस्थाका रुपमा कोरोना संक्रमणबाट प्रभावित सांसदका लागि बेग्लै कक्षमा मतदानको व्यवस्था गरिएको थियो ।