ललितपुर । गोदावरी नगरपालिकाले बालुवा, सिमेन्ट, गिट्टीलगायतका निर्माण सामग्री र निर्माण कार्य परीक्षण गर्न प्रयोगशाला स्थापना गरेको छ ।  बज्रबाराहीस्थित नगरपालिकाको कार्यालयमा राखिएको प्रयोगशालाको आइतबार नगरप्रमुख गजेन्द्र महर्जनले उद्घाटन गरे । यो प्रयोगशालामा छिमेकी नगरपालिकाले समेत निर्माण सामग्री र निर्माण कार्यको गुणस्तर परीक्षण गर्न सक्नेछन् । गोदावरी नगरपालिकाभित्र हुने निर्माणमा प्रयोग गरिने सामग्रीहरूको गुणस्तर यस प्रयोगशालामा परीक्षण गरिने नगरप्रमुख महर्जनले बताए । प्रयोगशालामा निर्माण कार्यको समेत परीक्षण हुने उनले जानकारी दिए । उनले भने, ‘गोदावरी नगरपालिकाभित्र हुने निर्माण अब झन गुणस्तरीय हुन्छ, हाम्रा पूर्वाधारहरु बलिया हुन्छन् ।’ छिमेकी नगरपालिकाले समेत गोदावरीको प्रयोगशालामा निर्माण सामग्री र कार्य परीक्षण र गर्न सक्ने नगरप्रमुखले बताए । उनले भने, ‘ छिमेकी पालिकाले समेत यहाँ निर्माण सामग्री परीक्षण तथा कार्य गराउन सक्नु हुन्छ ।’ अन्य पालिकाले गोदावरी नगरको प्रयोगशालामा निर्माण सामग्री र निर्माण कार्य परीक्षण गराउँदा नगरको राजश्व वृद्धि हुने उनको भनाई थियो । नगर प्रमुख महर्जनले भने, ‘हाम्रो नगरमा भएको पूर्वाधार निर्माणमा अब कुनै खोट हुने छैन ।’ 

नगरप्रमुखका अनुसार यस्तो प्रयोगशाला स्थापना गर्ने औंलामा गन्न सकिने स्थानीय तह मध्ये गोदावरी नगरपालिका एक हो ।  गोदावरी नगरपालिकाका प्रमुख प्रशासकीय अधिकृत अच्युतराज रेग्मीले प्रयोगशाला स्थापनाले गोदावरी नगरपालिका बलियो पूर्वाधार निर्माणमा केन्द्रित रहेको प्रष्ट भएको बताए । छिमेकी पालिकाहरुले समेत यहाँको पालिकामा रहेको प्रयोगशालामा निर्माण सामग्री र निर्माण कार्य परीक्षण गर्न सक्ने उनले बताए ।  उनले भने, ‘ गोदावरीको राजश्व संकलनमा समेत यो प्रयोगशालाले सहयोग पु¥याउँछ ।’  गोदावरी नगरपालिकाका इन्जिनियर मुकुन्द वस्तीले वालुवा, गिट्टी,इँटा, सिमेन्टको परीक्षण प्रयोगशालामा हुने बताए । उनका अनुसार ढलान भएको सडक कोर कटिङ गरेर त्यसको परीक्षण , पिच भएका सडकको कोर कटिङ गरी मोटाइ ठिक भए नभएको परीक्षण, पिच र ढलान हुनु भन्दा अगाडि गरिने वेस र सववेसको डेनसिटी परीक्षण र ढलानको ह्याम्बर परीक्षण समेत प्रयोगशालामा हुनेछ । इन्जियिनियर वस्तीले गुणस्तरसहितको पूर्वाधार निर्माणलाई प्राथमिकता र महत्व दिन प्रयोगशाला स्थापना गरेको बताए ।