ललितपुर । ललितपुर महानगरले लगनखेल बसपार्कलाई पुनः बस स्ट्याण्डमा परिणत गर्न छलफल सुरु गरेको छ ।  महानगरमा आयोजित छलफल कार्यक्रममा नगरप्रमुख चिरीबाबु महर्जनले महानगरलाई बसपार्क देखेर लाज लागेको बताए । उनले भने, ‘महानगरको अरु ठाउँ र त्यो ठाउँ तुलना गर्न मिल्दैन, त्यहाँको अवस्था देखेर महानगरलाई लाज लागेको छ ।’ शहरीकरणका कारण त्यो ठाउँमा बसपार्क राखिएको बताउँदै उनले मच्छिन्द्रनाथको रथ घुमाउन राखिएको खुल्ला ठाउँ भएको नगर प्रमुखले प्रष्ट पारे । उनले भने, ‘त्यो ठाउँ अस्तव्यस्त भएकाले क्रिटिसिजम भइरहेको छ , यो सुधार गर्न अत्याश्यक छ । , यो वास्तवमा बसपार्क होइन, रथ घुमाउन राखिएको खुल्ला ठाउँ हो ।’  उपप्रमख मञ्जली शाक्य बज्राचार्यले बसपार्क व्यवस्थित र फुटपाथ व्यवस्थापनको विषयलाई एकैसाथ संबोधन गर्नुपर्ने बताइन् । उनले भनिन् ‘फुटपाथ र पार्क व्वस्थापनलाई छुट्याएर काम गर्दा समस्या समाधान हुन सक्दैन । ’ 
कार्यक्रममा नगर प्रहरी प्रमुख सिताराम हाछेथुले कार्यक्रममा प्रस्तुत गरेको लगनखेल बसपार्क व्यवस्थापनसम्बन्धी प्रस्तुतिमा लगनखेल बसपार्कमा चापागाउँ, कीर्तिपुर, भक्तपुर लगायतका ठाउँमा आउने बसलाई  स्ट्याण्डको रुपमा मात्रै राख्ने उल्लेख छ । सिताराम हाछेथुले भने, ‘लगनखेलमा एक दुई वटा मात्रै बस राख्ने अन्य बसहरु सम्बन्धित पालिकामा नै राख्ने व्यवस्था गर्नुपर्छ, यसो हुँदा बसपार्क व्यवस्थित बनाउन सकिन्छ । ’सरोकारवालाहरुले लगनखेल बसपार्क अत्यास लाग्दो अवस्थामा रहेको बताउँदै बसपार्कलाई सक्दो छिटो व्यवस्थित गर्नुपर्ने बताए । 
नगरप्रमुख चिरीबाबु महर्जनले अन्य पालिका र अन्य सरोकारवालासँग पनि छलफल गर्ने बताए । उनले भने, ‘सम्बन्धित पालिकामा नै सवारी साधन क्यूमा राख्ने, यहाँ एक दुईवटा मात्रै राख्ने व्यवस्था भए , यहाँ सहज हुन्छ , यो विषयमा छलफल गर्नपनि सबै पालिकासँग छलफल गर्नुपर्छ । ’ 
ललितपुरका सहायक जिल्ला अधिकारी कल्पना घिमिरे नेपालले बसपार्क बस स्ट्याण्डमा बदल्नु अघि व्यवसायी र जनसमुदायलाई पर्याप्त सूचना दिनुपर्ने बताइन् । उनले भनिन् , ‘ बसपार्क व्यवस्थापनका सन्दर्भमा समस्या, चुनौतिको बारेमा राम्रो विश्लेषण गर्नुपर्छ । ’
कार्यक्रममा ललितपुर महानगर वडा नं। ५का वडा का अध्यक्ष विकासमान श्रेष्ठ, वडा नं १२ का वडाअध्यक्ष नारायणलाल अवाले, वडा नं.१९का वडा अध्यक्ष राजेन्द्र महर्जन,वडा नंं.६ का वडा अध्यक्ष रुपेन्द्रराज शाक्य, महानगरका सल्लाहकार बाबुराज महर्जनलगायतले लगनखेल बसपार्क व्यवस्थापन अत्यावश्यक भएको बताए । कार्यक्रममा जिल्ला प्रहरी परिसरका प्रहरी उपरीक्षक नरेश सुवेदी, उपत्यका ट्राफिक प्रहरीका प्रहरी उपरीक्षक विश्वराज खड्का , ट्राफिक प्रहरी  परिसर सातदोबाटोका प्रहरी निरीक्षक शालिकराज तिमिल्सिनाले मन्तव्य राखेका थिए ।