ललितपुर । गोदावरी नगरपालिकाले वडा नं ४ स्थित तपेश्वरधाम वनक्षेत्रमा लागेको आगो निभाउन क्रममा घाइते भई मृत्यु भएका शंकर पहरी र रमेश पहरी (रमी)को परिवारलाई जनही पाँच लाख राहत दिने निर्णय गरेको छ । 
गोदावरी नगरपालिकाको बुधबार बसेको आकस्मिक कार्यपालिका बैठकले शंकर र रमेश पहरीको परिवारलाई जनही पाँच लाख राहत दिने निर्णय गरेको हो । नगरप्रमुख गजेन्द्र महर्जनले नहुनुपर्ने घटना भएकोमा दुःख व्यक्त गर्र्दै भने,‘नहुनुपर्ने घटना भयो, नगरपालिकाको सहयोगले परिवारलाई केही राहत होस् भन्ने हो । ’ तापेश्वर धामसँगैको वनमा लागेको डढेलो नियन्त्रण गर्न गएका शंकरको मंगलबार निधन भएको थियो । गम्भीर घाइते भएका रमेशको बुधबार निधन भएको हो । घाइते भएका दुबैलाई कीर्तिपुरस्थित बर्न अस्पतालमा उपचारका लागि लगिएको थियो ।