ललितपुर । ललितपुर महानगरले एसर्इई दिएर बसेका विद्यार्थीका लागि आयोजना गरेको १ महिने सफ्टवेयर कोडिङ तालिम सकिएको छ । तालिम लिएका विद्यार्थीलाई महानगर प्रमुख चिरीबाबु महर्जनले प्रमाणपत्र वितरण गरे । उनले भने, ‘यो प्रमाणपत्रले तपाईंको सिभी बलियो बनाउँछ, करियर अघि बढाउन सहगोग पुग्छ ।’ आफूलाई यो तालिमबारे धेरै कुरा थाहा नभएको बताउँदै उनले भने, ‘फुर्सद भएका भए म पनि तपाईंहरुसँगै तालिम  लिन्थेँ ।’  महानगरपालिकाको सामाजिक विकास समिति संयोजक तथा प्रवक्ता राजु महर्जनले यो तालिम उपयोगी भएको बताए । उनले भने, ‘तालिम लिएपछि आफूलाई चाहिने पकेट मनी कमाई गर्न सकिन्छ, आफ्नो खर्च बुवा,आमासँग माग्नु पर्दैन । ’  आगामी आर्थिक वर्षमा अन्य समूहलाई बेसिक तालिम र यो समूहलाई एडभान्स तालिम दिने जानकारी दिए ।  सामाजिक विकास समिति सदस्य उमा श्रेष्ठ बज्राचार्यले तालिमले रोजगारी सिर्जना गर्ने बताउँदै आर्थिक रुपमा आत्मनिर्भर बन्न सहयोग गर्ने बताइन् । तालिम प्रदायक संस्थाकी  प्रतिक्षा पाण्डेले कम्प्युटरले बुझ्ने भाषामा दिने आदेश कोडिङ भएको बताइन् । प्रविधिको आवश्यकता र ज्ञान सबै विषयमा आवश्यक भएको बताउँदै  सफ्टवेयर इन्जिनियरिङ पढ्नेका लागि त यो तालिम महत्वपूर्ण भएको स्पष्ट पारिन् । तालिममा सहभागी विद्यार्थीले महानगरले एसइई दिएका विद्यार्थीलाई उपयोगी तालिम दिएको बताए ।