काठमाडौं । उपप्रधानमन्त्री एवं सहरी विकासमन्त्री प्रकाशमान सिंहसँग नेपालका लागि भारतका राजदूत नवीन श्रीवास्तवले भेटवार्ता गरेका छन् ।  आज सिंहदरबारस्थित मन्त्री सिंहको कार्यकक्षमा उक्त भेट भएको हो ।  भेटमा उनीहरुबिच द्विपक्षीय हित र आपसी चासोका विविध विषयमा छलफल भएको थियो ।  राजदूत श्रीवास्तवले मन्त्री सिंहलाई सफल कार्यकालको शुभकामना व्यक्त गर्दै सहयोग अभिवृद्धिका निम्ति भारत सरकार तयार रहेको मन्त्रालयका सचिव मणिराम गेलालले जानकारी दिएका छन् ।  उनले भने, ‘आजको भेट सहरी विकासमन्त्रीको सफल कार्यकालको लागि शुभकामनाको लागि थियो ।

भारत सरकारले नेपालको सहरी विकासमा के कस्तो सहयोग गर्न सक्ने सम्भावना छ । हामी सहयोग गर्न तयार छौ भन्ने प्रतिबद्धता व्यक्त गर्नु भएको छ ।’  उनले सिंह र राजदूत श्रीवास्तवबीच सहरी विकास, नदी प्रदूषण नियन्त्रण र फोहरमैला व्यवस्थापनमा भारतले गर्न सक्ने सहयोग बारेमा पनि छलफल भएको बताए ।  उनले भने, ‘भारतले नेपाललाई सहयोग गर्न सक्ने राम्रो क्षेत्र भनेको फोहोरमैला व्यवस्थापन, नदीनालाहरुको प्रदूषणको नियन्त्रणलगायतका काममा सहकार्य गर्न सक्छौ भन्ने कुरा उहाँले राख्नु भएको छ ।’

यस्तै, छलफलमा भारतीय राजदूतावासबाट २० करोडसम्मको लागतको साना साना पूर्वाधारको निर्माण कार्य देशभर गर्नको लागि सहयोग गर्ने कुरा पनि भएको बताए ।  उनले भने, ‘भारतीय सहयोगमा पुनःनिर्माणका केही कामहरु भइरहेका छन् । त्यो बारेमा सामान्य समीक्षा भएको छ । भारतीय राजदूतावासबाट २० करोडसम्मको लागतको साना साना पूर्वाधारका काम गर्नलाई सहयोग प्राप्त हुन्छ । देशभर नै यो कार्यक्रम लागू गर्न सकिन्छ त्यसको लागि संघीय मामिला तथा सामान्य प्रशासन मन्त्रालयबाट नयाँ कार्यविधि पनि पास भएको छ ।’