रौतहट । रौतहटको पश्चिमी भेग फतुवा बिजयपुर नगरपालिकाको प्रमुख प्रशासकिय अधिकृतमा प्रमोद कुमार गुप्ताले जिम्मेवारी पाएका छन् । फतुवा विजयपुरमा ह्याट्रिक गरेका उपसचिव सुरेन्द्र प्रधानलाई संघीय मन्त्रालयले सरूवा गरेकाे छ । संघीय मामिला तथा सामान्य प्रशासन मन्त्रालयको २७ गते आइतबारको पत्रअनुसार नेपाल स्वास्थ्य सेवा हेल्थ ईनपेक्सन समूह अधिकृत स्तर सातौं तह कार्यरत प्रमोदकुमार गुप्तालाई स्थानीय सरकार सञ्चालन ऐन २०७४ को दफा ८४ अनुसार प्रमुख प्रशासकिय अधिकृत को रुपमा जिम्मवारी दिइएको छ। अर्को प्रमुख प्रशासकीय अधिकृत नखटाए सम्म वा अर्को ब्यबस्था नभएसम्मको लागि कार्यालयको आर्थिक तथा प्रशासनिक कामको जिम्मेवारी दिइएको मन्त्रालयका शाखा अधिकृत केशवराज पाण्डे द्वारा हस्ताक्षरित पत्रमा उल्लेख गरिएको छ । उपसचिव सुरेन्द्र प्रधान तेस्रो पटक फतुवा विजयपुरको प्रमुख प्रशासकीय अधिकृतको रूपमा गत फागुन महिनामा आएका थिए। आर्थिक वर्ष २०८०–२०८१ को अन्तिम महिना असार मसान्तमा मनपरी अथवा जनप्रतिनिधिको सल्लाह बिना नै लाखौंको बजेट चलाएको आरोप लागेको थियो । कार्यवाहक मेयर अम्बेया खातुन, वडाअध्यक्ष सहित अन्य जनप्रतिनिधिले पनि प्रधान कार्यालयको सट्टा बाहिर बाहिर बसेर असार मसान्तमा चेक काटेको आरोप लगाएका थिए । त्यतिमात्र नभई उपसचिव भएर पनि प्रधानले फतुवा विजयपुरमा बसेर कुनै पक्षको चित बुझाउन नसकेको मेयर प्रत्यासीहरुको गुनासो गरेका थिए । फतुवा विजयपुरमा नेपाली कांग्रेस पार्टीको टिकटबाट निर्वाचित मेयर गोपालराय यादव नदीको टेन्डरमा अख्तियार द्वारा दोषी ठहर भई बिशेष अदालतबाट दण्ड जरिवाना तोकिएपछि गत वर्ष उनको पद गएकाे थियाे । कांग्रेसकै उपमेयर खातुन कार्यवाहकको जिम्मेवारी पाएकी थिइन् ।  खातुन कार्यवाहक भएदेखि नै सिंगो नगरपालिका अस्तव्यस्त बनेको छ। कार्यवाहक मेयर खातुनले कांग्रेसकै नेताको ईशारामा कांग्रेस कै वडा अध्यक्षहरु षडयन्त्र गरेर आफूलाई असफल बनाउन खोजेको बताउँदै आएकी छिन् । उता वडा अध्यक्षहरुले कार्यवाहक मेयर खातुन प्रमुख प्रशासकीय अधिकृतसँग मिलोमतो गरी आर्थिक अनियितता गर्न खोजेको आरोप लगाउँदै आएका छन् । २०७९ को स्थानीय निर्वाचनपछि नगरपालिकाले समयमा बजेट ल्याउन नसक्दा पटकपटक शिक्षक कर्मचारीले समयमा तलब पाउने गरेका छैनन् ।