काठमाडौं । चन्द्रागिरी नगरपालिका–२ नागढुङ्गाबाट अवैध लागूऔषध खैरो हेरोइन जस्तो देखिने पदार्थ पाँच ग्रामसहित काठमाडौं महानगरपालिका–१९ रानीबारी बस्ने ३० वर्षीय राजकुमार श्रेष्ठलाई प्रहरीले पक्राउ गरेको छ । प्रहरी प्रभाग नागढुङ्गा समेतबाट खटिएको प्रहरीले धरानदेखि काठमाडौंतर्फ आउँदै गरेको बा.प्र ०१–००६ ख ५८८३ नम्बरको बसलाई जाँच गर्ने क्रममा बसमा सवार उनलाई उक्त पदार्थसहित पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ । यस्तै धरान उपमहानगरपालिका–१३ निसानेबाट अवैध लागूऔषध गाँजा करिब ९८ किलोग्राम सोमबार बिहान प्रहरीले बरामद गरेको छ ।  सोही उपमहानगरपालिका–१३ आँपगाछीमा अस्थायी प्रहरी चौकी अमरहाटबाट खटिएको प्रहरीले धनकुटाबाट धरानतर्फ आउँदै गरेको बा.११ च ५९४३ नम्बरको कारलाई रोकी जाँच गर्न खोज्दा कार नरोकी भागेको र सोही ठाउँस्थित निसानेमा कार छाडेर चालक फरार भएपश्चात प्रहरीले कार तलासी गर्दा डिकीमा चारवटा बोरामा रहेको उक्त गाँजा फेला पारी बरामद गरेको हो । प्रहरीले हाल फरार कार चालकको खोजी गर्नुको साथै यस सम्बन्धमा आवश्यक अनुसन्धान गरिरहेको छ ।