काठमाडौं । नेकपा एकीकृत समाजवादीका कार्यबहाक अध्यक्ष राजेन्द्र प्रसाद पाण्डे र क्युबाली कार्यबहाक राजदूत अवेल अवेली डिपेग्नीबीच भेटवार्ता भएको छ । एकीकृत समाजवादीको केन्द्रीय कार्यालय आलोकनगर काठमाडौँमा सोमबार कार्यबहाक अध्यक्ष पाण्डे र अवेलीबीच भेटवार्ता भएको हो । उक्त भेटमा २०२२ देखि अमेरिकाले क्युबालाई आतंककारी देशको सूचीमा राखेको राजदूत अवेलीले जानकारी गराए । राजदूत अवेलीले क्युबाका जनता असाध्यै कष्ट र संघर्षमा बाँचिरहेका जानकारी गराउँदै क्युबाको वर्तमान अवस्थाबारे अवगत गराउँदै नेपालले क्युवाको पक्षमा बोल्न अनुरोध गरेका थिए । उनले अमेरिकाले घोषणा गरेको आतंकारी मुलुकको सूचीबाट हटाउनका निमित्त ऐक्यवद्धता जनाउन एकीकृत समाजवादीलाई अनुरोधसमेत गरेका छन् । एकीकृत समाजवादीका कार्यवाहक अध्यक्ष पाण्डेले राजदूँत अवेलीको प्रस्तावलाई गम्भीर रुपमा लिएको बताए । पाण्डेले आफूहरु क्युबाली जनताको स्वतन्त्रा, सार्वभौमिकता पक्षामा रहेको बताए । साथै, पाण्डेले अमेरिकाले क्युबालाई आतंकारी देशको सूचीमा राख्नु बेठिक रहेको बताए । अमेरिकी सरकारसँग क्युबालाई आतंकारी देशको सूचीमा नराख्न अपिल गरेका छन् । उनले भने, ‘हाम्रो पार्टी क्युवाली जनताको पक्षमा छ। त्यहाँको क्यम्युनिष्ट पार्टीसँग राम्रो सम्बन्ध राख्न, थप घनिष्ठ सम्बन्ध राख्न चाहान्छ। हामी क्युबाको क्रान्तिकारी इतिहासप्रति गर्व गछौं। शक्तिशाली देश अमेरिको नजिकै रहेको समाजवादी देश क्युबाले साम्राज्यवादी विरुद्ध दृढतापूर्वक शीर ठाडो पारेर लडिरहेकोप्रति गर्व गर्छौं ।’  राजदूत अवेलीले क्युबाली जनताको एकता, साम्राज्यवादप्रतिको घृणा र क्युबाली नेताहरूको कुशल नेतृत्वका कारण अमेरिकासँग नझुकिकन निरन्तर भिडिरहेको बताए । क्युबाले लामो समयदेखि नाकाबन्दीको सामना गरिरहेको छ । भेटमा पार्टीका नवनिर्वाचित उपाध्यक्ष जगन्नाथ खतिवडा, पोलिट्ब्यूरो सदस्य सुदेश पराजुली, केन्द्रीय सदस्य माधव पन्तलगायतका नेताहरूको सहभागिता थियो ।