काठमाडौँ । काठमाडौंँ महानगरपालिकाले खोप अभाव भएको जनाई कोभिड–१९ विरुद्धको चिनियाँ खोप लगाउने  अभियान दुई दिन अगाडि नै रोकेको छ ।   कामपाले यही जेठ २५ देखि ६० देखि ६४ वर्ष उमेर समूहका नागरिकलाई भेरो सेल खोप अभियान जेठ २९ गतेसम्म सञ्चालन गर्ने भने पनि सरकारले खोप उपलब्ध गराउन नसकेको कारण देखाउँदै शुक्रबारदेखि खोप कार्यक्रम स्थगन गरेको हो  । 
कामपा स्वास्थ्य विभाग प्रमुख हरि कुँवरले भने, ‘स्वास्थ्य सेवा विभागको खोप महाशाखाबाट भोलि (शुक्रबार) देखि खोप उपलब्ध गराउन नसक्ने जानकारी आएपछि दुई दिनअगावै अभियान रोकिएको हो ।’ तीन दिनको अवधिमा उक्त उमेर समूहका करीब २८ हजार नागरिकलाई पहिलो मात्राको खोप दिइएको छ । जिल्ला जनस्वास्थ्य कार्यालयले कामपालाई ३२ हजार मात्र खोप उपलब्ध गराएकामा तीन दिनका अवधिमा २८ हजार प्रयोग भइसकेको छ ।