धापाखेल (ललितपुर) । ललितपुर महानगरपालिका २४ नं. वडा धापाखेलले मूल सडकको मुहार फेर्ने योजनाका विषयमा बृहत् छलफल गरेको छ । वडा कार्यालयले शनिबार तीनकुने पोखरी दानघाट टोलस्थित वडा कार्यालयको नयाँ भवनमा मूल सडकको सीमाले छोएका जग्गाधनी, बुद्धिजीवि तथा सरोकारवालासँग बृहत् छलफल गरेको हो । छलफलमा उपस्थित जग्गाधनीहरूले मूल सडक साँघुरो हुँदा आउजाउमा अप्ठ्यारो परेको भन्दै बाटो स्तरोन्नतिमा आफूहरू बाधक नबन्ने प्रतिवद्धता जनाएका छन् । सडक स्तरोन्नतिका लागि सीमाङकन गर्दा सडकको दुबैतर्फका जग्गाधनीहरूप्रति समान व्यवहार हुनुपर्नेतर्फ वडा कार्यालयको ध्यानाकर्षण गराउँदै उनीहरूले सडक विस्तार तथा स्तरोन्नतिसम्बन्धी कार्य छिटो गर्न आग्रह गरेका थिए । सडक छेउमा निर्माण भएका घरहरूको मुआब्जाको व्यवस्था भइनसकेकोले यथावत राखिने विषय पनि वडा कार्यालयले सरोकारवालालाई जानकारी गराएको छ । धापाखेलको मूल सडक जीर्ण हुँदा यहाँका वडावासी बर्षामा हिलो तथा हिउँदमा धुलो खान बाध्य छन् ।  चालु आर्थिक वर्षमा धापाखेलको मूल सडक विस्तार तथा स्तरोन्नतिका लागि संघीय सरकारबाट बजेट विनियोजना भइसकेको छ भने वडा कार्यालयले पनि वडा बजेटबाट आवश्यक मात्रामा  बजेट विनियोजन गर्ने प्रतिवद्धता जनाएको छ । महानगर २४ नं. वडाका वडाअध्यक्ष दिनेशजंग पाण्डेले धापाखेलको मूल सडक सुधार तथा स्तरोन्नतिका लागि आवश्यक बजेट सुनिश्चित भएको बृहत भेलामा जानकारी दिनु भएको छ ।  ‘चालु आर्थिक वर्षमा संघीय सरकारको भौतिक पूर्वाधार तथा यातायात मन्त्रालयबाट १ करोड तथा संघीय सरकारकै सहरी विकास मन्त्रालयबाट थप १ करोड ५३ लाख बजेट प्राप्त भएको छ’  वडाअध्यक्ष पाण्डेले भन्नुभयो, ‘मूल सडक सुधार तथा स्तरोन्नतिका लागि वडा कार्यालयले वडा स्तरीय बजेटबाट १ करोड रुपैयाँ खर्च गर्नेछ ।’ 

‘अब छिट्टै मूल सडक विस्तार तथा स्तरोन्नतिको काम सुरु गर्नेछौं', उहाँले बृहत छलफलमा भन्नुभयो, ‘वडा बजेटबाट पर्खाल लगाउने, आवश्यक ठाउँमा ढल तथा नालि निर्माण गर्ने कार्य गरिने छ । संघीय सरकारको बजेट कालोपत्रेमा मात्रै खर्च गर्नेछौं ।’ वडा कार्यालयरहेको तीन कुने पोखरीबाट काम गर्न सम्झौता भएसके पनि बृहत छलफलका सहभागीले साविक ३ नं वडाको सीमाबाट बाटो विस्तार तथा स्तरोन्नतिका कार्य थालनी गर्न माग गरेपछि वडाले पनि सोही स्थानबाट बाटो निर्माणको कार्य थालनी गर्ने वडाअध्यक्ष पाण्डेले बताउनुभयो । बृहत् छलफलमा वडासदस्य उद्धब बस्नेतले मूल सडक सीमाङकन तथा स्तरोन्नति कार्य साविक ३ नं वडाबाट नै सुरु गर्ने माग आएबमोजिम काम सुरु गर्ने बताउनु भयो । छलफलमा वडासदस्य हरिकृष्ण महर्जनले साविक ३ नं वडामा काम गर्न विगतमा केही अप्ठ्यारो भएको स्मरण गर्दै अवका दिनमा यस्तो हुन दिन नहुनेमा जोड दिनुभयो ।
छलफलमा वडा कार्यालयले मूल सडक १४ मिटर रहने जनाउँदै त्यसमध्ये १० मिटर कालोपत्रे हुने जनाएको छ । धापाखेल वडा नं. २४ मा मूल सडकको लम्बाई अढाई किलोमिटर जति रहेको छ । बृहत छलफलमै वडाअध्यक्ष पाण्डेले वडा नं २४ धापाखेल र वडा नं. २७ सुनाकोठी वखाटलाई जोड्ने महादेव खोलामा सवारीसाधन सञ्चालन गर्न मिल्ने पक्की पुल निर्माणको चरणमा पुगेको पनि जानकारी दिनुभएको थियो । उहाँले चौतारा हरिसिद्धी जोड्ने सडकको बाँकी कामका लागि पनि बजेट प्राप्त भई ठेक्का प्रक्रियासमेत भइसकेको जनाउँदै छिट्टै काम सुरु गर्ने चरणमा रहेको जनाउनुभयो ।  उक्त पुल निर्माणपछि २४ नं. वडा कार्यालय रहेको तीनकुने पोखरी दानघाट टोलबाट आरोलो हुँदै सुनाकोठी  निस्कन सहज हुनेछ । यो स्थानमा पुल नहुँदा सवारी साधानहरूले सुनाकोठीबाट धापाखेल जान धापाखेल दोबाटो तथा हात्तिबनसम्मको यात्रा तय गर्नुपर्ने बाध्यता भोग्दै आएका छन् । बाटो सीमाङकन तथा स्तरोन्नतिका विषयमा आयोजित छलफल कार्यक्रममा वडा सदस्य इन्द्रा श्रीश, वडा सल्लाहकार पुरुषोत्तम पौडल, मूल सडकसँग सीमा जोडिएका जग्गाधनी, सरोकारावाला तथा बुद्धिजीविहरूको बाक्लो उपस्थिति रहेको थियो ।