भक्तपुर । भक्तपुरको शहीद धर्मभक्त राष्ट्रिय प्रत्यारोपण केन्द्रमा भएको अनियमितताविरुद्ध आन्दोलनरत स्थानीयबासीले कार्यकारी निर्देशक डा.पुकारचन्द्र श्रेष्ठलाई बर्खास्त गर्न सरकारसँग माग गरेका छन् ।  स्वास्थ्य मन्त्रालयमा शुक्रबार एक पत्र बुझाउँदै उनीहरूले अनियमितता, भ्रष्टाचार र मानव अंग तस्करीमा संलग्न भएको भन्दै डा.श्रेष्ठलाई कारवाही स्वरुप बर्खास्त गर्न माग गेका हुन् ।  भक्तपुर नागरिक सरोकार समाज सेवा सुचारु संघर्ष समितिका तर्फबाट विष्णुकुमार पौडयाल, चन्द्रलाल सुवाललगायतले स्वास्थ्यमन्त्री प्रदीप पौडेललाई बर्खास्तको पत्र बुझाएका हुन् । उनीहरूले अस्पतालभित्र भइरहेको अनियमितता र अव्यथित अवस्था तत्काल अन्त्य गर्न माग पनि गरेका छन् ।  विगत लामो समयदेखि केन्द्रमा भइरहेको बेथिति र अनियमिततासम्बन्धी मौखिक तथा लिखित रूपमै सरकारलाई अवगत गराउँदै आएको भए पनि सुनुवाइ नभएपछि आन्दोलनकै कार्यक्रम स्वरुप पत्र बुझाइएको सुवालको भनाइ छ । विगत १५ दिनदेखि अस्पतालको गेट अगाडि विरोध प्रदर्शन गर्दै आइरहेका उनीहरूले भ्रष्टाचारी र अयोग्य नेतृत्वलाई अविलम्ब कारबाही, गैर कानुनी तरिकाले बर्खास्त चिकित्सकहरूलाई अविलम्ब पुनःबहाली, मुटु, कलेजो, मृर्गौला फोक्सो तथा नशा सेवाहरूलाई तुरुन्तै सुचारु गरी व्यवस्थित गर्न, सबै प्रकारका अस्पतालभित्र हुने सामाजिक उत्पीडन बन्द गर्न, कर्मचारीहरूको रोकिएको तलब सुविधा तुरुन्तै भुक्तानी गर्नुपर्ने लगायतका माग राख्दै उनीहरूले आन्दोलन गर्दै आएका छन् ।  आन्दोलनकै सिलसिलामा उनीहरूले स्वास्थ्यमन्त्री पौडेललाई भेटेर ज्ञापन पत्र बुझाइसकेका छन् । झण्डै दुई सयजनाको हस्ताक्षरसहित उनीहरूले केन्द्रमा देखिएका बेथितीहरूका विषयमा मन्त्री पौडेललाई जानकारी गराएका थिए । केन्द्रमा मुटु, कलेजो, मिर्गौला, फोक्सो तथा नसा सेवा तत्काल सुचारु गर्नुपर्ने, बिहान ९ बजेदेखि ४ बजेसम्म सेवा दिने वातावरण बनाउनुपर्ने, अस्पताल भित्र हुने सबै प्रकार सामाजिक उत्पीडन अन्त्य हुनुपर्ने, कर्मचारीहरूको रोकिएको तबल भत्ता श्रम ऐनअनुसार भुक्तानी हुनुपर्ने र केन्द्रको नेतृत्वलाई कारवाही गर्नुपर्ने माग छ । सरकारले कार्यकारी निर्देशक डा.श्रेष्ठलाई तत्काल बर्खास्त नगरे अस्पताल प्रवेशमा रोक लगाउने र आन्दोलनकारीका तर्फबाट कारवाही गर्ने चेतावनी समेत उनीहरूले दिएका छन् ।