काठमाडौं । चिनियाँ कम्युनिष्ट पार्टी केन्द्रीय समितिको अन्तर्राष्ट्रिय विभागले नेपालमा आएको बाढी प्रकोपका लागि आपतकालीन राहत कार्य सुरु गरेको छ । शुक्रबार चीनको राष्ट्रिय दिवसको ७५औँ वार्षिकोत्सवको अवसरमा विभागले नेपालमा बाढी प्रकोपमा परेकाहरुको लागि आपतकालीन राहत कार्य सुरु गरेको हो । काठमाडौं महानगरपालिका–१२ स्थित महेन्द्र सरस्वती सेवा आधारभूत विद्यालयमा भएको एक कार्यक्रममा राहत कार्यक्रमका विषयमा छलफल भएको थियो । कार्यक्रममा नेपालस्थित चिनियाँ दूतावासका काउन्सिलर वाङ जिन, नेपालका प्रमुख राजनीतिक दलका प्रतिनिधि, चाइना फाउण्डेशन फर रुरल डेभलपमेन्ट नेपाल कार्यालयका कर्मचारी र साझेदारहरू, स्थानीय बासिन्दा र सरकारी अधिकारीहरू सहभागी थिए । कार्यक्रम अन्तर्गत आकस्मिक विपत्तिमा परेका प्रभावित ६० घरधुरीलाई किट र खाद्य सामग्री वितरण गरिएको थियो । अविरल वर्षाका कारण बाढी, पहिरो, सडक अवरुद्ध, घर भत्किने, पुल भत्किएको साथै स्थानीय बासिन्दाको जनधनको ठूलो क्षति भएको छ । दुई सयभन्दा बढी व्यक्तिको मृत्यु भएको जानकारी गराइएको छ । दर्जनौं बेपत्ता र घाइते छन् । प्रकोपको जवाफमा सीपीसी अन्तर्राष्ट्रिय विभाग समितिको केन्द्रीय समितिले नेपाली पार्टीहरूमार्फत बाढी प्रभावित समुदायहरूलाई तुरुन्तै सहयोग गरेको उल्लेख गरिएको छ । काठमाडौं उपत्यकाका बाढीपीडितलाई सहयोग गर्न चिनियाँ कम्युनिष्ट पार्टी केन्द्रीय समितिको अन्तर्राष्ट्रिय विभागले तुरुन्तै कारबाही अघि बढाएको हो । अत्यावश्यक सामग्री खरिद, ढुवानी, र आपूर्तिको व्यवस्था गर्दै आपतकालीन राहत कार्य सुरु गर्दै टूथपेस्ट, टूथब्रस, तौलिया, साबुन, सेनेटरी प्याड, प्रेसर कुकर, प्याकेजिङका लागि प्लास्टिक कन्टेनर, कम्बल, लामखुट्टेको जाली, सुत्ने चटाई, पानीको जार लगायतका राहत सामग्रीहरु वितरण कार्य सुरु गरिएको जानकारी गराइयो । प्रभावित समुदायका लागि चामल, तेल, दाल–अत्यावश्यक सामग्री पनि वितरण गरिएको छ । चिनियाँ कम्युनिष्ट पार्टी केन्द्रीय समितिको अन्तर्राष्ट्रिय विभागले गरेको आपतकालीन राहत कार्यको प्रसंशा समेत भएको छ ।