धापाखेल (ललितपुर)  असोज दोस्रो साता कर्मनाशाख खोलमा आएको बाढीले बगाएर ल्याएको प्लास्टिक, कपडा र कागजजन्य फोहोर सरसफाई गरिएको छ । ललितपुर महानगरपालिकाको आह्वान तथा  महानगर २३ नं. वडा कार्यालयको संयोजनमा केइसी कलेज मुनिको कर्मनाशा खोलामा उक्त सरसफाई कार्य गरिएको हो ।   ललितपुर महानगरपालिकाले हिजो शनिबारदेखि बागमती, नख्खु खोला, कर्मनाशा खोलामा थुप्रिएका फोहोर संकलन गर्न अभियान थालेको छ । शनिबार बिहान ७ बजे देखि जनप्रतिनिधि, स्वास्थ्यकर्मी, वडाका सबै समितिका सदस्यहरू, संघ संस्थाका प्रतिनिधि, टोल सुधार समितिका प्रतिनिधि, गुठीका प्रतिनिधि, क्लबका प्रतिनिधि, आमा समूह,  महिला समूहका सदस्य, सुरक्षाकर्मी, महिला स्वास्थ्य स्वयंसेविका तथा समाजसेवीसहितका महानुभाव सरसफाइ अभियानमा सहभागी भएका थिए । 

गत असोज ११ र १२ गते आएको बाढीले बगाएर ल्याएका प्लास्टिकलगायत फोहोरले कर्मनाशा खोला वरपरको सौन्दर्य नै बिगारेको छ । महानगर कार्यपालिका बैठकले फोहोर संकलनमा सहभागी हुन आह्वान गरेअनुरुप हिजो शनिबार वडा कार्यालयहरू सफाई अभियानमा सहभागी भएका हुन् । 
वडा नं. २३ द्धारा कर्मनाशा खोला किनारमा आयोजित सरसफाई कार्यक्रमको शुभारम्भ वडाअध्यक्ष जीवन महर्जनले गर्नु भएको थियो । उक्त सरसफाई अभियानमा वडा नं. २३ का जनप्रतिनिधि, वडासचिव महेन्द्र खड्का, सामाजिक परिचालक सावित्रा गौतम, वडा कार्यालयका कर्मचारी, धापाखेल आधारभूत स्वास्थ्य चौकीका स्वास्थ्यकर्मी, महिला स्वास्थ्य स्वमय्सेविका तथा समाजसेवीहरूको सक्रिय सहभागिता गरेको थियो ।  

वडाअध्यक्ष जीवन महर्जनले असोज ११ र १२ गते आएको बाढीका कारण खोला किनारामा थुप्रिएको फोहोर संकलनका लागि महानगरले अभियान नै थालेको बताउँदै हिजोको अभियानमा पनि महिला समूहका सदस्य, संघ संस्थाका प्रतिनिधि तथा वडाबासीहरू सरसफाई अभियानमा सक्रियतापूर्वक जुटेको जानकारी दिनुभयो । गत असोज दोस्रो साता आएको बाढीका कारण खोला–नदी किनारमा रहेका वडाहरू बाढीबाट धेरै प्रभावित भएका छन् ।