धापाखेल (ललितपुर) । ललितपुर महानगरपालिका २४ नं. वडा धापाखेलले मूल सडकको मुहार फेर्ने योजनासहित आजदेखि सीमाङकन सुरु गरेको छ । वडा कार्यालयले शनिबार साविक ३ नं. वडाबाट मूल सडक विस्तार–स्तरोन्नतिका लागि सीमाङकन सुरु गरेको हो । शनिबार तीनकुने पोखरीसम्म सीमाङकन गरिएको छ । भोलि आइतबार तीनकुने पोखरीबाट माथिल्लो भागमा सीमाङकन गरिने वडाअध्यक्ष दिनेश जंग पाण्डेले जानकारी दिनुभयो ।  सडक विस्तार–स्तरोन्नतिका लागि सीमाङकन गर्दा सडकको दुबैतर्फका जग्गाधनीहरूप्रति समान व्यवहार गरिएको छ ।  

सडक छेउमा निर्माण भएका घरहरूको मुआब्जाको व्यवस्था भइनसकेकोले यथावत राखिने वडाअध्यक्ष पाण्डेले जानकारी दिनुभयो ।  सडक विस्तार–स्तरोन्नतिका लागि सीमाङकन गर्दा ठूलो संख्यामा वडावासी भेला भएका थिए । केही घरधनीहरूले सुरुमा सीमाङनप्रति असहमति जनाए पनि वडाअध्यक्ष दिनेशजंग पाण्डेले सम्झाइ बुझाई सीमाङकन कार्य अघि बढाउनु भएको थियो ।  धापाखेलको मूल सडक जीर्ण हुँदा यहाँका वडावासी बर्षामा हिलो तथा हिउँदमा धुलो खान बाध्य छन् ।  

चालु आर्थिक वर्षमा धापाखेलको मूल सडक विस्तार तथा स्तरोन्नतिका लागि संघीय सरकारबाट बजेट विनियोजना भइसकेको छ भने वडा कार्यालयले पनि वडा बजेटबाट आवश्यक मात्रामा बजेट विनियोजन गर्ने प्रतिवद्धता जनाएको छ । महानगर २४ नं. वडाका वडाअध्यक्ष दिनेशजंग पाण्डेले धापाखेलको मूल सडक सुधार तथा स्तरोन्नतिका लागि आवश्यक बजेट सुनिश्चित भएको जानकारी दिनु भयो ।  ‘चालु आर्थिक वर्षमा संघीय सरकारको भौतिक पूर्वाधार तथा यातायात मन्त्रालयबाट १ करोड तथा संघीय सरकारकै सहरी विकास मन्त्रालयबाट थप १ करोड ५३ लाख बजेट प्राप्त भएको छ’  वडाअध्यक्ष पाण्डेले भन्नुभयो, ‘मूल सडक सुधार तथा स्तरोन्नतिका लागि वडा कार्यालयले वडा स्तरीय बजेटबाट १ करोड रुपैयाँ खर्च गर्नेछ ।’ 

वडा बजेटबाट पर्खाल लगाउने, आवश्यक ठाउँमा ढल तथा नाली निर्माण गर्ने कार्य गरिने छ । संघीय सरकारको बजेट कालोपत्रेमा मात्रै खर्च गर्ने योजना वडा कार्यालयले बनाएको छ ।  विस्तार–स्तरोन्नतिका लागि सीमाङकन गर्दा मूल सडकको लम्बाई १४ मिटर कायम गर्दै नापजाँच गरिएको छ । नापजाँच गर्दा पुरानो पीचलाई आधार मानिएको छ । पुरानो पिचको मध्य भागलाई आधार मानेर त्यसको दायाँबायाँ बराबर भूभाग लिइएको छ । मूल सडक विस्तार–स्तरोन्नति गर्दा १० मिटर कालोपत्रे गरिने छ ।  बाँकी रहेको ४ मिटरको क्षेत्रफलमा नाला तथा फुटपाथ रहने छ । धापाखेल वडा नं. २४ मा मूल सडकको लम्बाई करिब अढाई किलोमिटर रहेको छ । बाटो विस्तार–स्तरोन्नति गर्न शनिबार गरिएको सीमाङकन नापजाँचमा वडाअध्यक्ष दिनेशजंग पाण्डे, वडा वडासदस्यहरू इन्द्रा श्रीश, निशा मालबुल, उद्धब बस्नेत, हरिकृष्ण महर्जनसहित मूल सडकले छोएका जग्गाधनीहरू, बाटोप्रति सरोकार राख्ने वडावासी, राजनीतिक दलका प्रतिनिधि, महिला समूहका प्रतिनिधिलगायतको उपस्थिति रहेको थियो ।