धापाखेल (ललितपुर) । ललितपुर महानगरपालिका २४ नं. वडा धापाखेलले मूल सडक विस्तार–स्तरोन्नतिका लागि सीमाङकन गरेको क्षेत्रमा धमाधम पर्खाल लगाउन सुरु गरेको छ । केही दिनअघि वडा कार्यालयले सडकको दायाँ बायाँ सीमाङकन गरी चिह्न लगाएको थियो । सीमाङकन गरिएका क्षेत्रमा वडावासीले स्वतस्फुर्त रुपमा पर्खाल भत्काउन अग्रसरता देखाइरहेका वडाअध्यक्ष दिनेश जंग पाण्डेले जानकारी दिनुभयो ।  

धापाखेलको मूल सडक सुधार तथा स्तरोन्नतिका लागि चालु आर्थिक वर्षमा संघीय सरकारको भौतिक पूर्वाधार तथा यातायात मन्त्रालयबाट १ करोड तथा संघीय सरकारकै सहरी विकास मन्त्रालयबाट थप १ करोड ५३ लाख बजेट प्राप्त भएको छ । विस्तार–स्तरोन्नतिका लागि सीमाङकन गर्दा मूल सडकको लम्बाई १४ मिटर कायम गर्दै नापजाँच गरिएको थियो । नापजाँच गर्दा पुरानो पीचलाई आधार मानिएको छ । पुरानो पिचको मध्य भागलाई आधार मानेर त्यसको दायाँबायाँ बराबर भूभाग लिइएको छ । मूल सडक विस्तार–स्तरोन्नति गर्दा १० मिटर कालोपत्रे गरिने छ ।  बाँकी रहेको ४ मिटरको क्षेत्रफलमा नाला तथा फुटपाथ रहने छ । धापाखेल वडा नं. २४ मा मूल सडकको लम्बाई करिब अढाई किलोमिटर रहेको छ ।