सिओल । दक्षिण कोरियाका राष्ट्रपति युन सुक येओलले मंगलबार राती लगाएको मार्सल ल अन्तत : असफल भएको छ । दक्षिण कोरियाली संसदमा भएको हिजो राति मतदानमा १९०-० मतका आधारमा सो असफल भएको हो । राष्ट्रपतिले मार्शल ल लगाए लगत्तै संसद बैठक बसेको थियो। संसद बैठक अबरोध गर्न संसदमा सेना परिचालन गरिएको थियो। कोरियाली सैनिकहरू हेलिकोप्टर र झ्यालका सिसा फुटाएर संसद भवन प्रवेश गरेका थिए । तर, सेनाको अबरोधका बाबजुद संसदले राष्ट्रपतिको कदम पुर्णत खारेज गरिदिएको छ । मार्शल ल लगाए लगत्तै सेनाहरू सडकमा निस्केका थिए, जहाँ जनताले प्रतिरोध गरिरहेको दृश्य देखिएको थियो । बिपक्षीले भने महाअभियोगवाट बच्नका लागि राष्ट्रपति युनले यो हत्कण्डा अपनाएको आरोप लगाएको छ । राष्ट्रपतिको अप्रत्याशित कदम पछि बिपक्षी दलले आकस्मिक बैठकसमेत बोलाएको थियो। लगत्तै संसदमा प्रवेश गरेका हुन् । युनले भने उत्तर कोरियाको कम्युनिष्ट शक्तिबाट देशलाई बचाउन र राज्य विरोधी तत्वहरूलाई हटाउन यो कदम आवश्यक भएको तर्क गरेका थिए । ‘उत्तर कोरिया समर्थक सेनालाई देशबाट हटाउन र उदार संवैधानिक प्रणालीको रक्षा गर्न यो निर्णय गरिएको हो’ उनले टेलिभिजन सम्बोधनमा भने । दक्षिण कोरियाका राष्ट्रपति युन सुक येओलले एक टेलिभिजन ब्रीफिङमा आफूसँग मार्शल लको सहारा लिनुको विकल्प नभएको बताएका थिए । यद्यपि, दक्षिण कोरियाली राष्ट्रपतिले मार्शल ल अन्तर्गत के प्रतिबन्ध लगाइनेछ वा कुन विशेष नियमहरू ल्याइनेछ भनेर बताइसकेका थिएनन ।  स्थामानिय चार संस्थाहरूले राष्ट्रपतिले मार्सल लको घोषणा गरेलगत्तै देशको विपक्षी डेमोक्रेटिक पार्टीले आफ्ना सांसदहरूको आपतकालीन बैठक बोलायो। बैठकमा राष्ट्रपतिले चालेका कदम र सरकारले लगाएको प्रतिबन्धका विषयमा पनि छलफल गरेर संसदमा गएका थिए । दक्षिण कोरियाको समाचार एजेन्सी योनहापका अनुसार दक्षिण कोरियाको विपक्षी डेमोक्रेटिक पार्टीका नेता ली जे म्युङले मार्शल लको घोषणा असंवैधानिक भएको बताए । अर्कोतर्फ सत्तारुढ पीपुल्स पावर पार्टीका प्रमुख हान दोङ–हुनले पनि मार्सल ललाई गलत भन्दै यसलाई रोक्ने वाचा गरेको दाबी पनि भइरहेको थियो, नभन्दै उनले पनि राष्ट्रपतिलाई साथ दिएनन् । समाचार अनुसार दक्षिण कोरियाली नेतृत्वको विपक्षी डेमोक्र्याटिक पार्टीले शक्तिको दुरुपयोग गरेको आरोपमा राष्ट्रपति युनलाई महाभियोग लगाउन माग गरेको एक महिनापछि मार्सल लको घोषणा गरिएको हो । विपक्षीहरुले राष्ट्रपतिले मार्सल ल लगाएर महाभियोगबाट बच्न चाहेको प्रारम्भिक प्रतिक्रिया दिएका छन् । विपक्षी नेता ली जे म्युङले मार्शल लले ‘पूर्ण तानाशाही’ निम्त्याउन सक्छ, यसको दुरुपयोगको ऐतिहासिक उदाहरणहरूलाई औंल्याउँदै चेतावनी दिएका छन् ।

राष्ट्रपतिले राजिनामा नदिए देशभर हडताल

दक्षिण कोरियाको सबैभन्दा ठूलो ट्रेड युनियन संगठनले राष्ट्रपति युन सुक एलको राजिनामा माग गर्दै हडताल आब्हान गरेको छ ।  १० लाख भन्दा बढी सदस्य भएको ट्रेड युनियनले युनले राजीनामा नगरेसम्म हडतालको आह्वान गरेको हो । दक्षिण कोरियाको सबैभन्दा ठूलो श्रम युनियनहरू मध्ये एक - कोरियन कन्फेडेरेसन अफ ट्रेड युनियनले आफ्ना सदस्यहरूलाई राष्ट्रपति युन सुक योलले राजीनामा नगरेसम्म हडतालमा उत्रनआह्वान गरेको छ । फेसबुकमा एक पोस्ट युनियनले युनको छोटो अवधिको मार्शल लको घोषणालाई "विद्रोहको अपराध" भनेर वर्णन गरेको छ, जबकि यस कदमको विरोध गर्न आफ्ना १० लाख भन्दा बढी सदस्यहरूलाई सियोल र अन्य क्षेत्रीय स्थानहरूमा भेला हुन आह्वान गरेको छ । "युन सुक-योलले आफ्नो राजनीतिक जीवन विस्तार गर्न मार्शल लको तर्कहीन र अप्रजातान्त्रिक विधिलाई छनोट गरेका छन् किनभने उनी किनारमा धकेलिएका छन्," समूहले यसअघि एक विज्ञप्तिमा भनेको थियो । "जनताले यसलाई माफ गर्दैनन्। उनीहरूले मार्शल ल घोषणा गर्ने शासनको नियति सम्झन्छन्," सो सगठनले भन्यो । राष्ट्रपतिले लगाएको मार्शल ल त्यहाँको संसदले केही बेरमा नै खारेज गरिदिएको थियो । संसदको १९०-० मतले राष्ट्रपतिको कदम खारेज भए पछि उनले मध्यरातमा आफ्नो सो कदम फिर्ता लिएको घोषणा गरेका त छन् तर बिपक्षीसहित देशका अन्य संगठनले राजिनामा दिनु पर्ने माग गरेका छन्।  संसदले उनको कदममा बन्देज लगाए पछि उनी सार्बजनिक स्थलमा देखिएका छैनन। र, आजको सबै कार्यक्रम रद्द भएको राष्ट्रपतिको सचिवालयले जनाएको छ ।