भक्तपुर । नेपाल बुद्धिचाल महासंघ र भक्तपुर जिल्ला बुद्धिचाल संघको संयुक्त आयोजनामा राष्ट्रिय बी बुद्धिचाल प्रतियोगिता शनिवार सम्पन्न भएको छ । महासंघको पूर्व घोषित क्यालेण्डर प्रतियोगितामा नेपालका उदीयमान खेलाडी पुरुषोत्तम सिलवाल विजयी भएका हुन् । 
भक्तपुरको बाचामरीस्थित होटल सिटि गाउँ सभाहलमा ९ चरणको प्रतिस्पर्धात्मक खेल मार्फत काठमाडौंका युवा पुरुषोत्तम सिलवालले ६.५ अंक जोडेर उपाधि जितेका छन् । उनले ४ जीत र ५ बराबर नतिजा आत्मसाथ गर्दै अपराजित रहन पुगे । खेल पूर्व निर्धारित डाइरेक्ट इन्काउण्टर , मोष्ट वीन र बुछोल्स् नियम लागू भएअनुसार उनले बाजी मारेका हुन् । 

२५ औं राष्ट्रिय प्रतियोगिताको छनौटका रुपमा आयोजित स्पर्धामा समान ६.५ अंक जोडेर दोलखाका आशिष् फूँयाल द्वितीय र रौतहटका एफएम रुपेश जैसवाल तृतीय स्थान हासिल गर्न सफल भएका छन् ।  सूर्य विनायक नगरपालिकाको प्रायोजनमा पाँच दिनसम्म चलेको नेशनल बी चेस प्रतियोगिताका उत्कृष्ट चौथो स्थानदेखि नवौं स्थान प्राप्त गर्ने खेलाडीले समान ६ अंक जोडेर राष्ट्रिय खेलमा छनौट हुन सफल भएका छन् । 

प्रतिस्पर्धा मार्फत सानदार खेल प्रदर्शन गरी भक्तपुरका विनय थापा, ललितपुरका सुरोज महर्जन, काठमाडौंका धिरेन राई, सिएम नवीन तण्डुकार, प्रेमकृष्ण महर्जन र एफएम रिजेन्द्र राजभण्डारीले बाकी खेलाडीलाई पञ्छाउन सफल रहे । 
यसैबीच आज सम्पन्न पुरस्कार वितरण कार्यक्रममा नेपाल बुद्धिचाल महासंघका अध्यक्ष हेराकाजी महर्जनले सभापतिको आषणवाट विजेता पुरुष तथा महिला खेलाडीलाई अन्तर्राष्ट्रिय प्रतियोगितामा सहभागी गराउने प्रतिबद्धता जनाएका छन् । 

सूर्यविनायक नगरपालिका वडा नं. ७ का अध्यक्ष रविन्द्र सापकोटाले प्रमुख अतिथिको मन्तब्य दिदै स्थानीय निकायले खेलमा लगानी गरि देशको सान बढाउनु पर्ने धारणा राखेका छन् । समापन समारोहमा महासंघका महासचिव धरमबहादुर लामा, पूर्व उपाध्यक्ष रामप्रसाद कासुला, सचिवालय सदस्यद्वय निरञ्जन प्रजापति, राजु ताम्राकार लगायतको उपस्थिति रहेको थियो । 
प्रतियोगितामा ४० जना पुरुष र १८ जना महिला राष्ट्रिय खेलाडीले उज्बेकिस्तानमा हुने ४६ औं चेस ओलम्पियाडका लागि नेपाल च्याम्पियन सहित शीर्ष तिन खेलाडी सँग प्रतिस्पर्धा गर्नेछन् ।