काठमाडौँ । प्रमुख प्रतिपक्षी दल माओवादी केन्द्रका अध्यक्ष पुष्पकमल दाहाल प्रचण्डले सहकारी ठगी, संगठित अपराध, सम्पत्ति शुद्धीकरणलगायतका आरोपमा छानबिनका लागि प्रहरी हिरासतमा रहेका रास्वपा सभापति रवि लामिछानेमाथि प्रतिशोधपूर्ण व्यवहार रोक्न माग गरेका छन् । लामिछानेलाई सरकारले अमानवीय व्यवहार गरिरहेको अध्यक्ष प्रचण्डको दाबी छ । सामाजिक सञ्जालमार्फत प्रचण्डले सोमबार सरकारसँग लामिछानेविरुद्ध अमानवीय व्यवहार नगर्न आग्रह गरेका हुन् । 'अदालतबाट दोषी ठहर नभएका, अत्यधिक जनमतद्वारा निर्वाचित रास्वपाका सभापति रवि लामिछानेमाथि सरकारले गरिरहेको निरङ्कुश, अलोकतान्त्रिक, अमानवीय र प्रतिशोधपूर्ण व्यवहारको निन्दा गर्दछु', प्रचण्डले भनेका छन्, 'त्यसप्रकारको व्यवहार रोक्न गम्भीर आग्रह पनि गर्दछु ।' 
लामिछाने कार्तिक २ मा काठमाडौंबाट पक्राउ परेका थिए । सहकारी ठगीमा उनीमाथि कास्की प्रहरीको हिरासतमा राखेर अनुसन्धान भइरहेको छ । उनीमाथि रुपन्देही, चितवन, काठमाडौं र पर्सामा पनि पक्राउ पूर्जी जारी भएको थियो । ती जिल्लाहरूमा सहकारी ठगीमा उनीमाथि पक्राउ पूर्जी जारि भएको हो । उनलाई रुपन्देही, काठामाडौं र चितवन प्रहरीले बयान लिइसकेको छ । सोमबार मात्रै लामिछानेलाई चितवनबाट काठमाडौं हुँदै बयानका लागि पर्सा लगिएको छ ।