ललितपुर । प्रहरी प्रधान कार्यालयले जिल्ला प्रहरी परिसर ललितपुरमा प्रहरी वरिष्ठ उपरिक्षक (एसएसपी) श्यामकृष्ण अधिकारीलाई पठाएको छ । प्रधान कार्यालयले उनलाई पुस १७ गते ललितपुर प्रहरी प्रमुखका रुपमा पठाएको हो । अधिकारीलाई जिल्ला प्रहरी परिसर ललितपुरमा एक कार्यक्रमकाबीच स्वागत गरिएको छ ।

एसएसपी अधिकारीले पदधार पनि ग्रहण गरिसकेका छन् । यसअघि प्रहरी परिसर ललितपुरको प्रमुख रहेका प्रहरी वरिष्ठ उपरीक्षक शेखर खनाललाई परिसरले बिदाइ गरिसकेको छ । खनाल काठमाण्डौं उपत्यका प्रहरी कार्यालय, रानीपोखरी सरुवा भएका छन् ।

यसैबीच तनहुँबाट काठमाडौं आई बसोबास गरिरहेका एसएसपी अधिकारीका शुभचिन्तक हर्कबहादुर अधिकारीसहित रोशन कुँवर क्षेत्री, भरत बस्नेत, जगदिशचन्द्र न्यौपाने, हरिबहादुर अधिकारी, रामचन्द्र अधिकारी गोपाल अधिकारी तथा सिंहराज थापाको एक टोलीले एसएसपी अधिकारीलाई उनकै कार्यकक्षमा गएर बधाइ दिएको छ ।  टोलीले एसएसपी अधिकारीलाई सफल कार्यकालको शुभकामना पनि दिएको छ ।