मुगु । नवलपुरको कावासोतीमा भएको सवारी दुर्घटनामा मुगु जिल्ला समन्वय समितिका प्रमुख मञ्जन कार्की घाइते भएका छन् ।दुम्कीबासबाट कावासोती तर्फ आउँदै गरेको खाली टिपर र काठमाडौंबाट मुगु तर्फ जाँदै गरेका कार्की सवार सुमो गाडी पूर्व–पश्चिम राजमार्गको कावासोती– १६ चालिसकिलो जंगलमा एक–आपसमा ठक्कर खाएको हो । बागमती प्रदेश ०६–००१ ख ०२३१ नम्बरको टिपर र प्रमुख कार्की सवार गरेको गाडि नम्बर बा.१ झ ९११६ को सुमोमा दुर्घटना परेका हुन् । कार्कीको टाउकोमा चोट लागेको र अवस्था मध्यम रहेको प्रहरीले बताएको छ । उनीसँगै चालक मुगुको सोरु–३ बस्ने २० वर्षका भविरा कार्की समेत घाइते भएको जिल्ला प्रहरी कार्यालय नवलपुरका प्रहरी नायब उपरीक्षक जेशी शाहले बताए ।  उनको पनि अवस्था मध्यम रहेको र दुवैजनाको मध्यविन्दु जिल्ला अस्पतालमा उपचार भइरहेको प्रहरीले जनाएको छ ।