ललितपुर । गोदावरी नगरपालिकाले १ अर्ब ८२ करोड पाँच लाख रुपैयाँको बजेट पारित गरेको छ । ‘कृषि पुर्वाधार र पर्यटकीय नगरी, समावेशी स्वच्छ र समृद्ध गोदावरी’ भन्ने मूल नारासहित नगरपालिकाका उपप्रमुख मुना अधिकारीले आज नवौँ नगरसभामार्फत आउँदो आर्थिक वर्ष २०७८÷०७९ को लागि बजेट प्रस्तुत गरिन् । चालु खर्चतर्फ ९३ करोड ४४ लाख २० हजार  र पुँजीगत योजनातर्फ  ८८ करोड ६१ लाख ४९ हजारको बजेट सर्वसम्मतले पास भएको छ ।  यसैगरी गोदावरीले मुलुकमा फैलिरहेको कोरोना महामारीलाई ध्यानमा राखी वडा नं ५ लेले तथा वडा नं १४ बाँडेगाउँ प्राथमिक स्वास्थ्य केन्द्रमा २०–२० शैयाका अक्सिजनसहित आइसोलेशन कक्ष निर्माण गर्नाका साथै ज्येष्ठ नागरिक तथा गर्भवती र सुत्केरी महिलाका हितमा मल्टीभिटामिन र क्याल्सियमको व्यवस्था पनि गर्ने भएको छ ।
 बाह्र वर्षे गोदावरीका साथै नवदुर्गा मेलाका लागि अक्षयकोष खडा, पर्यटकको प्रभावकारी सत्कारका लागि सञ्चालित होटलमा ग्रीन स्टिकर टाँस्ने व्यवस्था, कक्षा १ मा २५ भन्दा बढी विद्यार्थी भर्ना गराई अन्तिम परीक्षामा सहभागी गराउने विद्यालयलाई प्रत्येक विद्यालय २० हजारका दरले प्रोत्साहन अनुदान दिने भएको छ ।  कृषि क्षेत्रको लगानी नतिजामूलक बनाउन तरकारी खेतीका लागि लेल, पुष्पका लागि गोदावरी, च्याँउका लागि चापागाउँ र गोलभेडा खेतीका लागि डुकुछाप क्षेत्रलाई पकेट क्षेत्रका रूपमा विकास गर्ने योजना गोदावरीले अघि सारेको छ ।