काठमाडौं ।  गैरआवासीय नेपाली संघ (एनआरएनए)को उच्चस्तरीय समितिको कार्यक्रमसङ्गै  बद्री केसी पक्षले पनि मंगलबार एक कार्यक्रम गरेको छ । जुन कार्यक्रम सर्वोच्च अदालतको फैसलाविपरीत भएको समितिको ठहर छ ।  संस्थापक अध्यक्ष उपेन्द्र महतोसहित पूर्व अध्यक्षहरू जीवा लामिछाने, भवन भट्ट, कुमार पन्तलगायतलाई बोलाएर बद्रीले छलफल गराएका हुन् । एकताको नाम दिइएपनी मे महिनामा हुने एकताको महाधिवेशनलाई बिथोल्ने नियतका साथ उक्त छलफल राखिएको बताइएको छ ।  तर, बद्रीको सोही कार्यक्रममै बोल्ने पूर्वअध्यक्षहरु,अभियन्ताहरु र एनसिसी अध्यक्षहरुले एकताको विकल्प नभएको बताएका छन । यद्यपि एकता महाधिवेशनका लागि बृहत छलफल आवश्यक रहेको उनीहरुको भनाइ रहेको थियो। सर्वोच्च अदालतको परमादेशानुसार परराष्ट्र मन्त्रालयले स्पष्ट रुपमा मे महिनामा एकताको महाधिवेशन गर्न भनिसकेको छ । यस्तो अवस्थाका बीच पनि बद्री समूह अझैपनि सर्वोच्चको परमादेशलाई चुनौति दिनेगरी अघि बढिरहेका छन ।  यस विषयमा समितिले डा बद्री केसीले बृहत् एकताको लागि भन्दै आयोजना गरेको संवादप्रति ध्यानाकर्षण भएको जनाउदै बिज्ञपति नै निकालेको छ ।  पूर्वअध्यक्ष एबम समितिका सम्योजक डा शेष घले नेतृत्वको समितिले सर्वोच्च अदालतको २०८० चैत २१ को आदेशअनुसार संघको सदस्यता, निर्वाचन प्रक्रिया लगायतका विषयहरूको समाधान गर्दै एकतापूर्ण महाधिवेशन सम्पन्न गराउने जिम्मेवारी पाएको विज्ञप्तिमार्फत जनाइएको छ।  विज्ञप्तिमा सर्वोच्च अदालतको आदेश विपरीत कुनै पनि गतिविधि नगर्न केसीलाई चेतावनी दिइएको छ ।  अदालतको निर्णयको उल्लङ्घन गर्ने कुनै पनि कार्य समितिका लागि स्वीकार्य नहुने विज्ञप्तिमा उल्लेख छ। साथै, समितिले एनआरएनए समुदायलाई एकता प्रक्रियामा सहभागी भई अदालतको आदेशअनुसार महाधिवेशन सम्पन्न गर्न सहयोग गर्न आह्वान गरेको छ । यस्तै परराष्ट्र मन्त्रालयमार्फत अदालतको आदेश कार्यान्वयन प्रक्रिया अघि बढिरहेको समेत उल्लेख छ ।  यसैबीच घलेले भने एकताको महाधिवेशन प्रक्रियालाई तिव्रता दिइसकेका छन् । उनले त्यसका लागि मंगलबार मूल आयोजक समिति,अभियन्ता र एनसीसी अध्यक्षहरुसँग छलफल गरेका छन् । उक्त बैठकमा बोल्ने सबै अभियन्ताहरूले तोकिएको मितिमा एकता महाधिवेशन गर्नुको विकल्प नभएको बताए ।  समितिका सदस्य बिनोद कुँवरले तोकिएकै मितिमा एकताको महाधिवेशन गर्नेगरी मूल आयोजक समितिले निष्कर्ष निकालेको बताए । मूल आयोजक समितिमा करिब २०० जना रहेका छन् ।  घलेले सदस्य बन्न योग्य सबै एनआरएनहरुलाई जति सक्दो चाडो सदस्यता लिएर वा नवीकरण गरेर मे ३–५, २०२५ मा काठमाडौँमा आयोजना हुन गैरहेको एकता महाधिवेशनमा सहभागी बन्न आह्वान समेत गरेका छन् । हाल समितिले सदस्यता खुला गरेअनुसार धमाधम सदस्य बन्नेक्रम तीव्र बनेको समेत उनको भनाइ छ ।