काठमाडौं । स्थानीय तह कर्मचारी संघ नेपालले काठमाडौं महानगरपालिकामा देखिएको प्रशासनिक समस्या हल गरी एक साता भित्र कर्मचारीको समस्या समाधान गर्न माग गरेको छ ।  स्थानीय तह कर्मचारी संघ नेपालका अध्यक्ष नारायणप्रसाद शर्माले आज एक विज्ञप्ति प्रकाशित गर्दै आम कर्मचारीको समस्या एक साता भित्र समाधान नगरे सम्पूर्ण पेशाकर्मीहरु एकत्रित भई समग्र महानगरवासीको हित र कर्मचारीको हक सुनिश्चितताको लागि कडा आन्दोलनका कार्यक्रमहरु घोषणा गरिने चेतावनी दिनु भएको छ । 
अध्यक्ष शर्माले जारी गरिएको विज्ञप्तिमा भनिएको छ, ‘देशकै संघीय राजधानीस्थित पहिलो स्थानीय तहको रुपमा स्थापना भएको काठमाडौं महानगरपालिकामा हालै देखिएको प्रशासनिक समस्याको सम्बन्धमा हाम्रो संघको गहिरो ध्यानाकर्षण भएको छ ।  विगत तीन महिनादेखि प्रशासनिक नेतृत्व विहिन हुँदा समग्र काठमाडौं महानगरपालिकाको प्रशासनिक यन्त्र अस्त व्यस्त बनेको छ । विगत तीन महिनादेखि पारिश्रमिक नपाउँदा झण्डै ४००० पेशाकर्मीहरुको दैनिकी चल्न सकेको छैन । लामो सयमसम्म तलब प्राप्त गर्न नसक्दा कर्मचारीहरूको कार्य मनोवल चरम खस्किएको छ भने विकास निर्माण लगायतका कार्यहरु ठप्प बनेका छ । यस्तो अवस्था हुँदा समेत सिंगो महानगर नेतृत्व जिम्मेवार एवम् गम्भीर भई समस्या समाधानका लागि सम्बिन्धत पक्षसँग समन्वयात्मक तवरले समस्याको निकासका लागि पहल गर्नुपर्नेमा झनै समस्या लम्ब्याउने तवरले सामाजिक सञ्जालको माध्यमबाट उछृंखल, अवाञ्छित एवम् उत्तेजित शब्दावली प्रयोग गरी थप समस्याको सृजना गर्न उद्दत देखिनुले समस्या हल गर्नतर्फ हैन, आफ्नो दम्भ प्रदर्शन गर्नतर्फ अग्रसर देखिन्छ ।’ 
स्थानीय तह कर्मचारी संघ नेपालका अध्यक्ष शर्माद्धारा हस्ताक्षतिर विज्ञप्तिमा भनिएको छ, ‘स्थानीय तहको प्रशासनिक र राजनीतिक नेतृत्व एकै सिक्काका दुई पाटा हुन् । शासन व्यवस्थामा एक अर्काबीच विश्वास एवम् सहयोग परिचालन गर्न सकेमा मात्र सार्वजनिक सेवा प्रवाहमा गतिशिलता तथा प्रभावकारिता हासिल गर्न सकिन्छ । नेपालको संविधानले समेत तीनै तहका सरकारको बीच सह–अस्तित्व, सहकार्य र समन्वयबाट मात्र शासन–प्रशासन सञ्चालनको परिकल्पना गरेको छ । यो खालको समन्वय र सहयोग परिचालन हुन नसक्दा समग्र शासन प्रणाली नै कमजोर भई आम नागरिकमा शासन व्यवस्था र सरकार प्रति नै नैराश्यता देखिन सक्छ । काठमाडौं महानगरपालिकाको हकमा उपरोक्त विधि र प्रक्रियाबाट नभई व्यक्तिको मौखिक आदेश, निर्देशनबाट प्रशासन संयन्त्र सञ्चालन गर्न खोज्दा हाल यो समस्या पैदा भएको हाम्रो ठहर छ ।’ 
‘अनाधिकृत व्यक्तिहरुबाट कर्मचारीहरुलाई त्रास एवम् भयको वातावरण सृजना गरी कानुन सम्मत ढंगले कार्य गर्न पाउने अधिकारलाई कुण्ठित गराई जवर्जस्त आदेश लाद्ने पद्दतीले काठमाडौं महानगरपालिकामा दिनानुदिन झनै जरा गाड्दै गएको छ । विधिको शासनको मूल्य मान्यतालाई शिरोपर गर्दै भयरहित वातावरणमा कार्मचारीहरुलाई काम गर्ने अवस्थाको सृजना गर्न र प्रशासनिक नेतृत्वलाई कार्यालयमा उपस्थित भई कामकाज गर्ने अविलम्व उचित वातावरण बनाउन महानगर नेतृत्वसँग जोडदार माग गर्दछौं’, स्थानीय तह कर्मचारी संघ नेपालले भनेको छ । 
‘यसपूर्व पनि यस संघले महानगरपालिकाका कर्मचारीहरुको पारिश्रमिक यथाशिघ्र उपलव्ध गराउन ध्यानाकर्षण गराएकोमा हालसम्म पनि उक्त समस्याको समाधान गर्नतर्फ अग्रसर रहेको देखिएन । अतः महानगरको समस्या र हाम्रो मागलाई वेवास्ता गरी अझ उत्तेजित हुँदै समस्या लम्ब्याउने, बल्झाउनेतर्फ उद्दत भई आम कर्मचारीको समस्या एक साता भित्र समाधान नगरेमा सम्पूर्ण पेशाकर्मीहरु एकत्रित भई समग्र महानगरवासीको हित र कर्मचारीको हक सुनिश्चितताको लागि कडा आन्दोलनका कार्यक्रमहरु घोषणा गरिने र उक्त परिस्थितिबाट सृजित परिणामको जिम्मेवारी पक्ष काठमाडौं महानगरपालिकाको नेतृत्व स्वयं हुने व्यहोरा समेत अवगत गराउन चाहन्छौं’, अध्यक्ष नारायणप्रसाद शर्माद्धारा जारी विज्ञप्तिमा भनिएको छ ।