काठमाडौं । सरकारले शुक्रबार काठमाडौंको तीनकुनेमा राजावादीहरुको विरोध प्रदर्शनका क्रममा भएको जनधनको क्षतिको सत्यतथ्य छानविन गर्ने र दोषीउपर कारवाही गर्ने निर्णय गरेको छ । राजावादीहरुले शुक्रबार गरेको हिंसात्मक आन्दोलनका कारण काठमाडौं असान्त भएपछि मन्त्रिपरिषद्‍को आकस्मिक बैठक बसेर सत्यतथ्य छानविनसहित दोषीमाथि कारवाही गर्ने निर्णय गरेको हो । ‘आज (चैत्र १५ गतेका दिन) पूर्वराजाहरुका समर्थकद्धारा काठमाडौंको तीनकुने र आसपासका क्षेत्रमा भएको अराजक प्रदर्शनका क्रममा नीजि, सार्वजनिक एवम सरकारी सम्पत्ति अस्पताल, सवारी साधन, राजनीतिक दलका कार्यालय साथै संंचार गृहहरुमा भएको तोडफोड, आक्रमण एवम अन्तार्राष्ट्रिय विमानस्थल जस्तो संवेदनशिल क्षेत्रमा हिंसात्मक गतिविधि गरी आतंक फैलाउने, घरभित्र मानिस भएको अवस्थामा ढुंगामुढा, आगजनी र मानिसको ज्यान लिनेजस्ता अमानवीय र गैरकानुनी कार्य भएकोप्रति नेपाल सरकार घोर भत्र्सना गर्दछ,’ सरकारका प्रवक्ता पृथ्वी सुब्बा गुरुङले मन्त्रिपरिषदको बैठक पछि भने ।
उनले उक्त घटनाको सत्यतथ्य छानविन गरी दोषी उपर कारवाही गर्ने निर्णय भएको जानकारी पनि दिएका छन् । साथै प्रदर्शनका क्रममा घाइते भएकाहरुको उपचार गर्न स्वास्थ्य मन्त्रालयलाई निर्देशन दिने निर्णय भएको पनि उनले बताए । शुक्रबार बेलुका बालुवाटारमा मन्त्रिपरिषद् बैठक बसेको हो । प्रधानमन्त्री केपी शर्मा ओलीले आकस्मिक रुपमा मन्त्रिपरिषद् बैठक डाकेका हुन् ।
काठमाडौंको तीनकुने, जडिबुटी, कोटेश्वर क्षेत्रमा राजावादी प्रदर्शन हिंसात्मक बनेपछि आकस्मिक बैठक बोलाइएको हो ।
यसैबीच, मन्त्रिपरिषदले म्यानमार र थाइल्याण्डमा गएको विनाषकारी भूकम्पका कारण भएको जनधनको क्षतिको दुःख व्यक्त गरेको पनि मन्त्री गुरुङ ले जानकारी दिएका छन् ।