ललितपुर । २०४६ सालको प्रजातान्त्रिक आन्दोलनका सहीद सागर सिंह र ज्ञान बहादुर शाहीको सम्मान र सम्झनामा कराँते प्रतियोगिता हुने भएको छ । नेपाल सितारियो कराँते डो प्रयागपोखरी डोजोले आउँदो सोमबार र मंगलबार सहीदहरु सागर सिंह तथा ज्ञानबहादुर शाहीको स्मृतिमा ’प्रथम कराँते प्रतियोगिता २०८१’ आयोजना गर्न लागेको हो । २०४६ सालको आन्दोलन उत्कर्षमा पुगेको बेला उनीहरुको चैत १७ गते तत्कालीन प्रहरी प्रशासनको  गोली लागेर मृत्यु भएको थियो । उहाँहरुको योगदानलाई अक्षुण र जीवन्त राख्न प्रतियोगिता आयोजना गरेको बागमती प्रदेशका सांसद तथा पूर्वमन्त्री रामकृष्ण चित्रकारले बताए । युवा खेलाडीलाई संगठित गर्नु प्रतियोगिता आयोजना गर्नुको अर्को मुख्य उद्देश्य भएको प्रष्ट पारे । ललितपुर महानगरका प्रमुख चिरीबाबु महर्जनले प्रतियोगिता प्रत्येक वर्ष गर्ने सम्बन्धमा प्राविधिक टोलीसँग छलफल भइरहेको बताए । उनले भने, ‘ सहीदको सम्मानमा भएको यो राम्रो काम हो । ’ प्रतियोगितामा करिब ६ सय खेलाडीको सहभागिता रहने प्रतियोगिता संयोजक गोपाल महर्जनले पत्रकार सम्मेलनमा जानकारी दिए । यो प्रतियोगिताको दुई विधा कुमिटे र काँतामा महिला र पुरुष सहभागी हुनेछन् । प्रतियोगितामा काठमाडौं, ललितपुर, भक्तपुर, काभ्रे र सिन्धुपाल्चोक जिल्लाबाट ३५ टिमसहभागी हुने आयोजक डोजोका प्रशिक्षक विकास महर्जनले बताए । वडा नं.६का वडा अध्यक्ष रुपेन्द्रराज शाक्यले सहीदको सम्मानका प्रतियोगिता आयोजना हुनु राम्रो काम भएको बताए । कार्यक्रममा ललितपुर महानगरका प्रवक्ता राजु महर्जन पनि उपस्थित थिए । ललितपुर महानगरपालिकाको मुख्य प्रायोजक ललितपुर महानगर सहप्रयोजक महालक्ष्मी नगरपालिका रहेका छन् । कार्यक्रममा सहीद सागर सिंहका भाइ बावुकृष्ण महर्जन र ज्ञान बहादुर शाहीका बुवा पूर्णबहादुर शाही पनि उपस्थिति थिए । शहीद सागर सिंहका भाइ बाबुकृष्णले सागर सिंहको खेलकुदमा रुचि रहेको बताए । उनले भने ,‘सुरुमा उहाँको फुटबलमा थियो, पछि कराँते खुबै खेल्न थाल्नु भएको थियो । ’