गत १० असारमा पोखराले चालू वर्षका लागि नीति तथा कार्यक्रम र बजेट ल्यायो । तर, हालसम्म त्यो प्रमाणीकरण भएको छैन । गत १ साउनमा मेयर मानबहादुर जिसीलाई मष्तिष्कघात भएपछि उनी काठमाडौंमा उपचाररत् छन् ।

जिसी बिरामी भएपछि पोखराको आर्थिक तथा विकासका सबै गतिविधि ठप्प भएका छन् । मेयरको अनुपस्थितिमा उपमेयरले काम गर्नुपर्ने कानुनी व्यवस्था छ । तीन महिनासम्म उपमेयरले कार्यबाहक जिम्मेवारी पाएकी छैनन् । यसले गर्दा कार्यपालिका बैठकसमेत बस्न सकेको छैन ।

अहिले पोखराका जनप्रतिनिधिहरूले नै विरोध गर्न थालेका छन् । पोखरा १३ का वडाध्यक्ष लेखबहादुर तामाङ (दर्शन लामा)ले मेयरको पारिवारिक अड्चनका कारण कार्यबाहकको जिम्मेवारी नदिएको आरोप लगाए । 

‘मेयरसाप बिरामी हुनुहुन्छ । उहाँलाई केही भन्ने ठाउँ छैन । तर, उहाँको छोरीज्वाइँलगायतले कार्यबाहक दिन मानेका छैनन् । अहिले पोखराको सबै गतिविधि रोकिएको छ’, उनले भने ।
कार्यकारी निर्णय गर्न नपाएका कारण राजश्व गुम्ने खतरा बढेको उनले बताए । 

‘रामघाटबाट वर्षेनी आठ करोडभन्दा बढी आम्दानी हुन्छ । तर, अहिले टेण्डर आह्वान पनि भएको छैन,’ लामाले भने, ‘कसको नियतका कारण यस्तो भइरहेको छ ? उपमेयरलाई कार्यबाहक नदिँदा पोखरामा ठूलो संकट निम्तिएको छ ।’

जिसी उपचारबाट फर्किए पनि अवस्था सामान्य नहुने चिकित्सकहरूले बताएका छन् । अहिले महानगरमा राजश्व संकलन बाहेकका अन्य सबै काम रोकिएका छन् । कर्मचारीले तलब पाएका छैनन् । काम सकेका उपभोक्ताले भुक्तानी पाएका छैनन् । विभिन्न ठेक्को म्याद सकिएको छ । तर, नवीकरण हुन सकेको छैन । बाढीपीडितहरूलाई राहत र उद्धारमा समेत समस्या परेको वडाध्यक्षहरू बताउँछन् ।

‘बाढीपहिरोले जनधनको क्षति भयो । हामीले आश्वासन दिएर आयौं । महानगरले तत्काल राहत र उद्धार गर्नुपथ्र्यो, तर गरेन,’ लामा भन्छन्, ‘हामीले आश्वासन दिएर आएका छौं । त्यसको निर्णय गर्ने अधिकार कार्यपालिकालाई छ । यो बैठक नै बस्न सकेन ।’

कांग्रेसलाई अहिले महाधिवेसन लागेको छ । वडाध्यक्ष र सदस्यहरूले महानगरको दैनिक कामकाजमा ध्यान दिएका छैनन् । दलका सचेतक रामराज लामिछाने आफू चुनावमा व्यस्त भएकोले महानगरको काममा ध्यान नदिएको बताए । 

‘म नगरसभापतिको उम्मेदवार हुँ । पार्टीको चुनाव लागिरहेको छ । वडामा कार्यबाहक दिएको छ । महानगरमा के भइरहेको छ, मलाई थाहा छैन,’ उनले भने, ‘चुनाव नसकिँदासम्म म केही बोल्दिनँ । चुनाव सकिएपछि खोजौंला ।’

उपमेयर मञ्जुदेवी गुरुङले मेयरको शल्यक्रिया सकिने बित्तिकै थप छलफल गर्ने बताइन् । ‘उहाँ शल्यक्रियामा हुनुहुन्छ । एक दुई पटक कुरा राखेको हो,’ उनले भनिन्, ‘अहिलेसम्म खासै धेरै बिग्रिएको त केही छैन । तर महत्वपूर्ण निर्णयहरू गर्न सकिएको छैन । अड्चन आइरहेको छ ।’ 

पोखरामा मेयर उपमेयरसहित २२ वडाध्यक्ष एमालेबाट निर्वाचित भएका हुन् भने ११ वटा वडाध्यक्ष कांग्रेसतर्फबाट निर्वाचित छन् । मेयर जिसीको सोमबार (आज) अन्तिम शल्यक्रिया हुँदैछ ।