काठमाडौं । लोकप्रिय धार्मिक सिरियल ‘रामायण’ मा लंकापति रावणको भूमिका निर्वाह गरेर चर्चामा आएका अभिनेता अरविन्द त्रिवेदीको मंगलबार राति १० बजे निधन भएको छ । ८३ वर्षीय त्रिवेदीको हृदयाघातका कारण निधन भएको भारतीय सञ्चारमाध्यमले जनाएका छन् ।  त्रिवेदीको निधनमा ‘रामायण’ मा सँगै अभिनय गरेका अरुण गोविल, सुनील लहरी, दीपिका चिखलियालगायका कलाकार, शुभचिन्तक तथा भारतीय प्रधानमन्त्री नरेन्द्र मोदीले समेत सामाजीक सञ्जालमार्फत दुःख व्यक्त गरेका छन् । उनले त्रिवेदीसँगको फोटोसहित गरेको पोस्टमा लेखेका छन्, ‘हामीले असाधारण अभिनेता अरविन्द त्रिवेदीलाई गुमाएका छौ । उनी अभिनेता मात्र होइन, जनसेवक पनि थिए । ‘रामायण’ टेलिशृंखलामा उनले गरेको काम भारतको आउने पिँढीले पनि याद गर्नेछ । अभिनेता त्रिवेदीको परिवार तथा शुभचिन्तकप्रति हार्दिक समवेदना ।’  रामानन्द सागरको ‘रामायण’ मा अरुण गोविलले राम, सुनील लहरीले लक्ष्मण र दीपिका चिखलियाले सीताको भूमिका निर्वाह गरेका थिए । कुनै दीर्घरोग नदेखिए पनि उनको स्वास्थ्य विगत तीन दिनदेखि धेरै बिग्रिएको जानकारी त्रिवेदी परिवारले दिएको छ । हृदयाघात भएपछि उनका अन्य अंगहरूले काम गर्न छाडेका थिए । उनले हिन्दी र गुजराती गरी तीन सय बढी फिल्ममा अभिनय गरेका छन् ।